Ազգային ժողովի պատգամավոր Կարեն Ավագյանը խորհրդարանում լրագրողների հետ զրույցում կոչ արեց «Զինվորական ծառայության և զինծառայողի կարգավիճակի մասին» օրենքի դեմ պայքարող երիտասարդներին ընդունել պաշտպանության նախարարության առաջարկն ու մասնակցել հանձնաժողովի աշխատանքներին:
Ավագյանի խոսքով՝ նա կոչ է արել ուսանողներին մասնակցել հանձնաժողովի աշխատանքներին, որ կարողանան գտնել այն հարցերի լուծումները, որոնց պատճառով իրենք հացադուլ են անում:
Լրագրողներից մեկի հարցին, թե ինչո՞ւ պատգամավորը չի հանդիպում ուսանողների հետ, նա պատասխանեց.«Չեմ հասկանում ձեր հարցը, կլինի՞ ես որոշեմ, ոչ թե դուք ինձ ուղղորդեք։ Ես պատգամավոր եմ և իմ գործունեությանը հստակ եմ տիրապետում», ասել է նա՝ հավելելով, որ եթե դրա կարիքը լինի և նրա հորդորով այդ մարդիկ կդադարեցնեն այդ պրոցեսները, ապա նա կխոսի:
Հիշեցնենք, որ Ազգային ժողովն այսօր՝ նոյեմբերի 15-ին, «Զինվորական ծառայության և զինծառայողի կարգավիճակի մասին» օրենքի նախագիծը երկրորդ ընթերցմամբ ընդունեց: Նախագծին կողմ է քվեարկել 86 պատգամավոր, դեմ` 6:
