Շարժական գույքի նկատմամբ գրավի իրավունքի գրանցման, փոփոխության, դադարման և դադարեցման համար դիմողն անձամբ, փոստով կամ այլ անձանց միջոցով (եթե դիմումում դիմումատուի ստորագրության իսկությունը վավերացված է օրենքով սահմանված կարգով) կամ իր լիազորած ներկայացուցչի միջոցով գույքի գտնվելու վայրից անկախ` ցանկացած սպասարկման գրասենյակ ներկայացնում է դիմում:
Դիմումներն ընդունվում են ըստ ներկայացման հերթականության, որը որոշվում է դիմումների գրանցման մատյանում նշված ամիս-ամսաթվով և ժամով:
Դիմումը և դրան կից փաստաթղթերը կարող են ներկայացվել էլեկտրոնային եղանակով:
Գրանցման վերաբերյալ ավելի վաղ ներկայացված դիմումներն ունեն առաջնահերթություն` ավելի ուշ ներկայացված դիմումների համեմատ: Դիմումն ամբողջությամբ լրացնում և ստորագրում է դիմողը (լիազորված ներկայացուցիչը):
Դիմումում նշվում են`
1) գրանցումն իրականացնող մարմնի անվանումը.
2) գրավատուի և գրավառուի անունները, բնակության վայրերը (իրավաբանական անձի դեպքում` լրիվ անվանումը, գտնվելու վայրը).
3) գրավի պայմանագրի կնքման վայրը և ժամանակը.
4) տեղեկատվություն գրավի առարկա շարժական գույքի վերաբերյալ, նրա նույնացման համարը.
5) գրավով ապահովված պահանջի ծավալը.
6) գրավով ապահովված պարտավորության կատարման ժամկետը.
7) դիմողի կամ նրա լիազորած ներկայացուցչի ստորագրությունը.
8) գրավի տեսակը, տեղեկություն հաջորդող գրավի արգելված կամ թույլատրված լինելու մասին.
9) դիմումի ներկայացման տարեթիվը (օրը, ամիսը, տարին), ժամը, րոպեն.
10) դիմումով ներկայացվող պահանջը:
Դիմողը պետք է ներկայացնի Հայաստանի Հանրապետության օրենսդրությամբ սահմանված` անձը հաստատող փաստաթղթեր, իսկ լիազորված լինելու դեպքում` նաև լիազորությունները հաստատող փաստաթուղթ:
Դիմումին կից ներկայացվում են շարժական գույքի գրավի պայմանագիրը և վճարի անդորրագրերը:
Փաստաթղթերը ներկայացվում են մեկ օրինակից` բնօրինակը կամ սահմանված կարգով հաստատված պատճենը:
Շարժական գույքի գրավի իրավունքի գրանցման համար, վերը նշված փաստաթղթերից բացի, այլ փաստաթղթեր պահանջելն արգելվում է:
