Հանրապետության տարածքում ներդրվելու է միասնական երթուղային ցանց, որի շնորհիվ բոլոր համայնքները կապահովվեն տրանսպորտային սպասարկմամբ, կբարձրանան ուղևորափոխադրումների սպասարկման որակն և վերահսկողության մակարդակը։
Այս մասին նշվում է Կառավարության ներկայացրած 2021-2026թթ․ ծրագրում։
Իրավաբան.net-ը ներկայացնում է տրանսպորտի ոլորտին վերաբերող հատված։
Հանրապետության տարածքում ներդրվելու է միասնական երթուղային ցանց, որի շնորհիվ բոլոր համայնքները կապահովվեն տրանսպորտային սպասարկմամբ, կբարձրանան ուղևորափոխադրումների սպասարկման որակն և վերահսկողության մակարդակը։ Մշակվելու և քարտեզավորվելու են բոլոր երթուղիները, կազմելու են նոր չվացուցակներ և ուղեգծեր: Կբարձրանա ուղևորափոխադրումների արդյունավետությունն ու մատչելիությունը։ Հանրապետության բոլոր բնակավայրերը կանոնավոր երթուղիներով կապվելու են մարզկենտրոնների կամ մարզի այլ խոշոր բնակավայրերի հետ, այնուհետև մայրաքաղաքի և հարևան մարզկենտրոնների հետ: Ստեղծվելու է հարթակ, որտեղից հնարավորություն է լինելու ամբողջական տեղեկություններ ստանալու երթուղիների վերաբերյալ, այդ թվում՝ մեկնման ժամերի, սկզբնակետերի/վերջնակետերի, ուղեգծերի և այլնի մասին:
Կանոնավոր ուղևորափոխադրումներում կիրառվելու են նորագույն տեխնոլոգիաներ, որի շնորհիվ հնարավոր կլինի.
- էլեկտրոնային եղանակով իրականացնել երթակարգավարական ծառայությունը և վերահսկողությունը,
- ներդնել միասնական տոմսային համակարգ,
- ներդնել ինտերակտիվ քարտեզ,
- ներդնել ճանապարհային վճարների գանձման և վթարների դեպքում արագ արձագանքման միասնական արդյունավետ էլեկտրոնային համակարգեր։
