«Ակնհայտ է, որ մարդիկ ուզում են մեկ բան՝ ուզում են այս ղալմաղալը դադարեցնել, իրար հետ պայքարելու այս ոճը, կռիվը, իրար ոչնչացնելու բոլորի ծրագրերը, մարդիկ ուզում են դրան վերջ դնել»,-այս մասին այսօր՝ հունիսի 11-ին, լրագրողների հետ ճեպազրույցում ասաց «Լուսավոր Հայաստան» կուսակցության նախագահ Էդմոն Մարուքյանը:
Նրա խոսքով՝ երկրի վիճակն այնպիսին է, որ ճոխություն է միմյանց ատելը, և պետք է պլան մշակել, թե ինչպես կարելի է Սյունիքից և Գեղարքունիքից թուրքերին հանել:
«Որ ուժը 51 տոկոս հավաքեց, մյուս ուժն ասելու է, որ կեղծվել են ընտրությունները, հանելու է ժողովրդին բերի հրապարակ, ցնցումներ են սկսվելու երկրի ներսում: Թուրքերը ժամացույցին նայելով սպասում են, թե դա երբ է լինելու»,-նշեց ԼՀԿ առաջնորդը:
Նա ասաց, որ եթե մեծամասնություն լինեն խորհրդարանում, պատրաստ են վարչապետի թեկնածու չառաջադրել և ընտրել վարչապետ բոլոր ուժերից դուրս որևէ մեկին և ձևավորել ազգային համաձայնության կառավարություն:
«Մենք ի սկզբանե ասել ենք՝ ոչ մի ուժի չենք միանալու, առանձին վերցրած, որ այդ ուժը գա, մյուս ուժերին ոչնչացնի: Կամ բոլոր ուժերով միանում ենք, երկիրն այս վիճակից հանում ենք կամ դա տեղի չի ունենա և տեղի կունենա ընտրությունների երկրորդ փուլ: Որպեսզի այդ 2-րդ փուլը տեղի չունենա, ևս 28 օր երկիրը ցնցումների մեջ չլինի, ի՞նչ է պետք անել, լիազորեք ԼՀԿ-ին, և մենք կձևավորենք համերաշխության և ազգային միասնության կառավարություն»,-ասաց Էդմոն Մարուքյանը:
