Կան դիրքեր, որոնք առավոտյան կորցրել ենք, այս պահին հետ ենք վերցրել. կան դիրքեր, որ կորցրել ենք, հետ չենք վերցրել: Այս մասին, այսօր՝ սեպտեմբերի 27-ին, լրագրողների հետ հանդիպման ժամանակ նշեց Արցախի նախագահ Արայիկ Հարությունյանը:
«Լայնածավալ պատերազմի ընթացքում լինում են պահեր, որ դիրքերը այդքան չեն կարևորվում այդ փուլում, քանի-որ ուզում եմ նորից նշել, որ սա ապրիլյան պատերազմը չէ, հունիսյան պատերազմը չէ: Հետ ենք վերցրել, թե հետ չենք վերցրել, այս պահին նշանակություն չունի: Այն, որ բանակը մարտունակ է եւ ցանկացած պատերազմի ժամանակ, մանավանդ հարձակվող կողմի համար խնդիրը լինում է կաթվածահար անել բանակի մատակարարումը, խանգարել բանակին իրականացնելու իր պարտականությունները, թշնամուն դա չի հաջողվել: Սա մեր ամենամեծ ձեռքբերումն է:
Մենք հաղթելու ենք, Ադրբեջանն իր առաջին օրվա խնդիրը չի կատարել:
Դիրք վերցնել-չվերցնելը եկեք չկարեւորենք, վերջում է լինելու պարզ՝ մենք կատարե՞լ ենք մեր խնդիրը, թե ոչ: Ես ուզում եմ հայտարարել, որ կատարել ենք»,-ասաց նա:
