Ֆրանսիայի հրապարակում «Դիմադրություն» շարժման հանրահավաքի ընթացքում Աժ պատգամավոր Տիգրան Աբրահամյանը, խոսելով կեղծ խաղաղության շրջանի մասին, հիշեցրեց, որ Նիկոլ Փաշինյանը մի քանի օր առաջ հայտարարել է, որ Ադրբեջանը լեգիտիմ հիմքեր է փնտրում Հայաստանի դեմ նոր պատերազմ սկսելու համար։ Քաղաքական գործիչն այս հայտարարության մեջ տեսնում է երկու խնդիր։
«Փաշինյանը հրապարակավ հայտարարում է, որ նրանց բոլորին խաբել են, քանի որ Նիկոլ Փաշինյանը եկել է կեղծ խաղաղության օրակարգով։ Իսկ այսօր Փաշինյանը խոստովանում է, որ իր խաղաղության քաղաքական կուրսը տապալվել է։
Նոր պատերազմի մասին հայտարարում է մեկը, որը մինչև հիմա ԶՈՒ ԳՇ պետ չի նշանակել։ Այսինքն՝ հնարավոր ռազմական գործողությունների դեպքում, գլխավոր գողծող կառույցի ղեկավար մինչև հիմա չի նշանակվել։ Հետո՝ նոր պատերազմի մասին խոսում է մեկը, ում նշանակած պաշտպանության նախարարը որևէ կապ չունի անվտանգության և պաշտպանության համակարգի հետ։
Նոր պատերազմի մասին խոսում է մարդ, որն, ըստ Սահմանադրության ռազամական գործողությունների ժամանակ գերագույն գլխավոր հրամանատարն է՝ իր տեսակով անպատասխանատու և խաբեբա, որը մեկ անգամ արդեն մեր ժողովրդին տարել է ողբերգության»,-ասաց Աբրահամյանը։
Պատգամավորն ընդգծում է՝ Նիկոլ Փաշինյանը նոր պատերազմի հայտարարությունով շանտաժի է ենթարկում մեր ժողովրդին, որպեսզի մեր երկիրը տանի նոր զիջումների ճանապարհով, ինչը տեսնում ենք և՛ Սյունիքի, և՛ Արցախի՝ Բերձորի հատվածքներում։
«Եթե իրականում պատերազմ է, արդյո՞ք ժողովուրդը պատրաստ է պատերազմի, արդյո՞ք այս ժողովուրդը, ում այս իշխանությունը խաբել է ՝ ասելով պատերազմ չի լինելու և կայունություն ու անվտանգություն ենք բերելու։Բայց հիմա ասում է՝ դա մեզանից կախված չէ և մեր գլխին նոր պատերազմ է կախված»,- նշեց քաղաքական գործիչը՝ իր խոսքն ուղղելով այն քաղաքացիներին, որոնք դեռևս չեզոք են իրենց պահում։
«Նիկոլ Փաշինյանը ձեզ նոր պատերազմ է բերում և նոր կորուստներ է բերելու՝ և՛ տարածքային, և՛ մարդկային»,- հավելեց նա։
Իսկ վերահաս պատերազմը կանխելու համար կա մեկ ճանապարհ ․ «Այս իշխանությանը դուրս շպրտելն է, այլ տարբերակ չկա»։
