Պետական գույքի կառավարման կոմիտեն հանրային քննարկման է ներկայացրել ««Օշական» մանկական վերականգնողական կենտրոն» փակ բաժնետիրական ընկերության լուծարման գործընթացը կանոնակարգելու մասին նախագիծը:
Նախատեսվում է ընդունել Արագածոտնի մարզի Օշական համայնքի Դպրոցականների փողոցի 93 հասցեում գտնվող ««Օշական» մանկական վերականգնողական կենտրոն» փակ բաժնետիրական ընկերության շենք-շինությունների սպասարկման և օգտագործման համար անհրաժեշտ՝ Օշական համայնքին սեփականության իրավունքով պատկանող 14.5136 հեկտար հողամասի նվիրատվությունը Հայաստանի Հարապետությանը։
««Օշական» մանկական վերականգնողական կենտրոն» փակ բաժնետիրական ընկերության լուծարման գործընթացը կանոնակարգելու և պարտավորությունները մարելու նպատակով տարածքային կառավարման և ենթակառուցվածքների նախարարության պետական գույքի կառավարման կոմիտեին 2019 թվականի պետական բյուջեով նախատեսված կառավարության պահուստային ֆոնդից 2019 թվականին կհատկացվի 61,002.8 հազար դրամ:
Նախագծի հիմանվորման մեջ նշվում է, որ պաշտպանության նախարարությունը գրությամբ դիմել է Պետական գույքի կառավարման կոմիտեին՝ նշելով, որ կարևորելով տնտեսական մրցակցության պաշտպանության պետական հանձնաժողովին տարածքով ապահովելու խնդրի կարգավորման անհրաժեշտությունը, առաջարկել է Երևանի Մոսկովյան փողոցի 5 հասցեում գտնվող պաշտպանության նախարարությանն ամրացված անշարժ գույքը հետ վերցնելու դիմաց պաշտպանության նախարարությանն ամրացնել Արագածոտնի մարզի Օշական համայնքի Դպրոցականների փողոց 93 հասցեում գտնվող «Օշական մանկական վերականգնողական կենտրոն» ՓԲԸ-ի տարածքը, ինչը կնպաստի գերատեսչության կարիքների բավարարմանն ու հեռանկարային ծրագրերի իրականացմանը։
Նախատեսվում է սահմանված կարգով ընդունել հողամասի նվիրատվությունը, Հայաստանի Հանրապետությանը, ՀՀ կառավարության պահուստային ֆոնդի միջոցների հաշվին մարել «Օշական մանկական վերականգնողական կենտրոն» ՓԲԸ-ի ամբողջ պարտավորությունները , որից հետո ընկերության ամբողջ գույքը որպես լուծարումից հետո մնացած գույք ամրացնել ՀՀ պաշտպանության նախարարությանը:
