Կառավարության որոշմամբ նախատեսվում է լուծարել «Հայաստանի ավտոմոբիլային ճանապարհների տնօրինություն» ՊՈԱԿ-ը, որի գործառույթները կիրականացնի ՀՀ տրանսպորտի, կապի և տեղեկատվական տեխնոլոգիաների նախարարությունը: ՊՈԱԿ-ը իր գործառույթներն իրականացնում է 50 հաստիքային միավոր ունեցող անձնակազմով, որի պահպանման համար պետբյուջեից տարեկան հատկացվում է 218.088.9 հազար ՀՀ դրամ: Արդյունքում՝ կտնտեսվի կազմակերպության վարչակազմի պահպանման համար պետբյուջեից տրամադրվող գումարը՝ 37.572.0 հազար ՀՀ դրամ:
Գործադիրն ընդունել է առանց մրցույթի դրամաշնորհ հատկացնելու և նախկինում ընդունած որոշումներում փոփոխություններ կատարելու մասին որոշում: ՀՀ կառավարության ծրագրով հաստատված տնտեսական զարգացման երեք հիմնական առաջնահերթություններից մեկը բարձր տեխնոլոգիաների ոլորտն է: Ըստ հիմնավորման՝ ներկայումս ՏՏ ոլորտում իրականացվում է պետբյուջեից ֆինանսավորվող երեք ծրագիր՝ «Տեղեկատվական տեխնոլոգիաների ոլորտի խթանման ծառայությունների», «Գյումրու և Վանաձորի տեխնոլոգիական կենտրոնների գործունեության իրականացման» և «2019թ. Տեղեկատվական տեխնոլոգիաների համաշխարհային համաժողովի կազմակերպման»: Որոշմամբ առաջարկվում է 2019 թ. ևս ծրագրերի համապատասխան միջոցառումների իրականացումը վերապահել «Ձեռնարկությունների ինկուբատոր» հիմնադրամին և «Ինֆորմացիոն տեխնոլոգիաների ձեռնարկությունների միությանը»:
