Հուլիսի 31-ին ՀՀ ոստիկանության պետ Վլադիմիր Գասպարյանը և ՀՀ պետական եկամուտների կոմիտեի նախագահ Գագիկ Խաչատրյանը այցելեցին ավտոտրանսպորտային միջոցների մաքսային ձևակերպումների մասնագիտացվածմաքսատան վարչական տարածքում նույն օրը բացված Ճանապարհային ոստիկանության Երևանի հաշվառման-քննական բաժնի սպասարկման կետ` տեղում ծանոթանալու ստորաբաժանման աշխատանքային պայմաններին, քաղաքացիների սպասարկման կարգին ու առանձնահատկություններին:
ՀՀ ոստիկանության և ՀՀ պետական եկամուտների կոմիտեի համատեղ նախաձեռնությամբ բացված սպասարկման կետը հնարավորություն է տալու առավել բարձր մակարդակով կազմակերպել տրանսպորտային միջոցների գրանցման, հաշվառման աշխատանքները, բարձրացնել բնակչության սպասարկման որակը: Մասնավորապես, քաղաքացիները կկարողանան անմիջապես տրանսպորտային միջոցների մաքսազերծումից հետո կատարել «Ներմուծում ազատ շրջանառության համար» և «Ժամանակավոր ներմուծում» (2 ամսից ավելի ժամկետով) մաքսային ռեժիմներով հանրապետություն ներմուծված տրանսպորտային միջոցների սեփականության իրավունքի պետական գրանցում և պետական հաշվառում` տեղում հաշվառման վկայագրի հատկացմամբ:
Տրանսպորտային միջոցներ ներմուծող ֆիզիկական և իրավաբանական անձինք հնարավորություն կունենան առանց մաքսատան վարչական տարածքից դուրս գալու կատարել նաև սեփականության իրավունքի գրանցման և հաշվառման բոլոր գործառույթները` ցանկալի և մեծ պահանջարկ ունեցող համարանիշերի հատկացմամբ:
Սպասարկման նոր կետի գործարկումը թույլ է տալիս թեթևացնել Ճանապարհային ոստիկանության հաշվառման-քննական մյուս ստորաբաժանումների աշխատանքային ծանրաբեռնվածությունը և բացառել ներմուծված տրանսպորտային միջոցների տրանզիտային համարանիշերով շահագործումը հանրապետության ճանապարհներին:
Այցի ավարտին պատասխանելով լրագրողների հարցերին` ՀՀ ոստիկանության պետ Վլադիմիր Գասպարյանը նշեց, որ պետեկամուտների կոմիտեի հետ համագործակցությունն ուղղված է հասարակությանը ծառայություններ մատուցող ստորաբաժանումների աշխատանքի արդյունավետության բարձրացմանը, գործընթացների պարզեցմանն ու արագացմանը, ճանապարհային երթևեկության կատարելագործմանը ու, մեծ հաշվով, ևս մեկ քայլ է բարեփոխումների իրականացման և հասարակության ակնկալիքների իրագործման ճանապարհին:
Մաքսատան վարչական տարածքում բացվել է ՃՈ սպասարկման կետ
![](/banner/iravaban-net_840x90.png)
![](https://iravaban.net/wp-content/uploads/2012/07/31-07-2012-5.jpg)