Գևորգ Գ․-ն մեղադրվում է 2023թ. սեպտեմբերի 19-ին ժամը՝ 16:00-ի սահմաններում Արմավիր քաղաքի այգիներից մեկում անչափահաս Ս․ Խ․-ի ներկայությամբ անառակաբարո արարք կատարելու համար։ Տղամարդը այգու նստարանին նստած իջեցրել է իր հագին եղած տաբատի շղթան և դուրս հանելով սեռական օրգանը՝ կատարել է ձեռնաշարժություն, որը տեսնելով՝ Ս․Խ․-ն անմիջապես զանգահարել է ոստիկանություն և հայտնել կատարվածի մասին:
Այս մասին Iravaban.net-ը տեղեկացավ «Դատալեքս» դատական տեղեկատվական համակարգից։
Գործը դատարան է ստացել փետրվարի 27-ին և մակագրվել դատավոր Կարինե Դավթյանին։ Որպես խափանման միջոց է ընտրվել բացակայելու արգելքը։
Վարույթի մասնակիցների դիրքորոշումները․
Պաշտպանության կողմը միջնորդություն է ներկայացրել դատարանին իր նկատմամբ քրեական հետապնդումը դադարեցնելու մասին՝ տուժողի հետ հաշտվելու հիմքով։
Տուժողի օրինական ներկայացուչիչը հայտնել է, որ կողմ է հաշտությանը։
Հոգեբանի մասնակցությամբ տուժող Ս․ Խ․-ն հայտնել է, որ հաշտությունն իր ազատ կամարտահայտությունն է եղել, անցել է երկար ժամանակ, որևէ բողոք չունի։
Ի պատասխան դատարանի հարցադրումների՝ նշել է, որ իր վրա որևէ ազդեցություն, սպառնալիք, ճնշում չի գործադրվել։
Պաշտպանության կողմը պնդել է միջնորդությունը, ի պատասխան դատարանի հարցադրմանը, պաշտպանը հայտնել է, որ մեղադրյալին պարզաբանվել են ոչ ռեաբիլիտացնող հիմքով քրեական հետապնդումը դադարեցնելու իրավական հետևանքները։
Հանրային մեղադրող Էդգար Բաբայանը առարկություն չուներ։
Դատարանը որոշել է մեղադրյալ Գևորգ Գ․-ի նկատմամբ քրեական հետապնդումը դադարեցնել՝ մեղադրյալի և տուժողի հաշտության հիմքով, քրեական գործի վարույթը կարճել։
Խափանման միջոցը՝ բացակայելու արգելքը, վերացնել:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
