Նախագահ Վահագն Խաչատուրյանը հոկտեմբերի 24-ին հրամանագիր է ստորագրել, որով Վիգեն Քոչարյանը նշանակվել է Վճռաբեկ դատարանի քաղաքացիական պալատի դատավոր:

Հրամանագրում ասվում է․

«Հիմք ընդունելով Սահմանադրության 166-րդ հոդվածի 3-րդ մասը, ինչպես նաև Ազգային ժողովի 2024 թվականի հոկտեմբերի 23-ի «Վիգեն ՔՈՉԱՐՅԱՆԻՆ Վճռաբեկ դատարանի քաղաքացիական պալատի դատավորի թեկնածու ընտրելու մասին» ԱԺՈ-93-Ա որոշումը.

Վիգեն ՔՈՉԱՐՅԱՆԻՆ նշանակել Վճռաբեկ դատարանի քաղաքացիական պալատի դատավոր»:

Նշենք, որ հոկտեմբերի 23-ին Ազգային ժողովում 67 կողմ ձայներով Վճռաբեկ դատարանի քաղաքացիական պալատի դատավոր ընտրվեց Վիգեն Քոչարյանը։

Ներկայացնում ենք Վիգեն Քոչարյանի կենսագրությունը։

Ծնվել է 1972 թվականին:

Կրթություն

1988-1993 թթ. սովորել և գերազանցության դիպլոմով ավարտել է Երևանի պետական համալսարանի իրավագիտության ֆակուլտետը:

1996 թվականին Սանկտ Պետերբուրգի պետական համալսարանում շնորհվել է իրավաբանական գիտությունների թեկնածուի գիտական աստիճան:

Աշխատանքային փորձ

1996 – 2006 թթ. հանդիսացել է ԵՊՀ Սահմանադրական և միջազգային իրավունքի դասախոս, դոցենտ:

1998-2008 թթ. հանդիսացել է Հայաստանի Հանրապետության իրավաբանների միության գործադիր տնօրեն:

1999 թվականին ԱՄՆ Կալիֆորնիայի Բերկլիի համալսարանում մասնակցել է Երիտասարդ դասախոսների վերապատրաստման ծրագրին:

1999 – 2003 թթ. հանդիսացել է ՀՀ Նախագահին առընթեր սահմանադրական բարեփոխումների հանձնաժողովի անդամ:

2001 թվականին Քեմբրիջի համալսարանում եղել է որպես հրավիրված հետազոտող:

2001 – 2015 թթ. եղել է Ռասիզմի և անհանդուրժողականության դեմ պայքարի եվրոպական հանձնաժողովի (Եվրոպայի խորհուրդ) Հայաստանը ներկայացնող անդամ:

2004-2008 թթ. հանդիսացել է Ազգային փոքրամասնությունների պաշտպանության շրջանակային եվրոպական կոնվենցիայի Խորհրդատվական կոմիտեի հանձնաժողովի (Եվրոպայի խորհուրդ) Հայաստանը ներկայացնող անդամ:

2006-2014 թթ. եղել է Երևանի պետական համալսարանի Եվրոպական և միջազգային իրավունքի ամբիոնի հիմնադիր վարիչը:

2015-2019 թթ. աշխատել է որպես ՀՀ արդարադատության նախարարի տեղակալ:

2019 թ. հունիսին Հայաստանի Հանրապետության Ազգային ժողովի կողմից ընտրվել է Բարձրագույն դատական խորհրդի անդամ: