Բարձր տեխնոլոգիական արդյունաբերության նախարարությունը հանրային քննարկման է ներկայացրել «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» և «Բարձր տեխնոլոգիաների ոլորտի պետական աջակցության մասին» ՀՀ օրենքների նախագծերը։
Iravaban.net-ի փոխանցմամբ՝ հիմնավորման մեջ նշված է, որ նախագծերի նպատակը բարձր տեխնոլոգիական ոլորտի, ինչպես նաև գիտահետազոտական աշխատանքների համար պետական աջակցության գործիքակազմի և հարկային արտոնությունների շրջանակի վերանայումն է՝ նպատակ ունենալով ստեղծել ավելի բարենպաստ պայմաններ նշյալ ոլորտներում առաջանցիկ զարգացում ապահովելու համար:
«Բարձր տեխնոլոգիաների ոլորտի զարգացումը Հայաստանի Հանրապետության կառավարության գործունեության առաջնայնություններից է: Այն տնտեսության գերակա ճյուղերից մեկն է և միևնույն ժամանակ՝ ամենաարագ զարգացող ոլորտներից մեկը, որը նպաստում է երկրի տնտեսության աճին, մրցունակության և արտադրողականության բարձրացմանը, աշխատատեղերի ստեղծմանը և Հայաստանի Հանրապետության՝ որպես առաջադեմ գիտելիքահենք արդյունաբերությամբ երկրի վարկանիշի բարձրացմանը:
Նախագծի ընդունման անհրաժեշտությունը պայմանավորված է Հայաստանի Հանրապետությունում բարձր տեխնոլոգիաների ոլորտի տնտեսավարողներին ազգային և միջազգային մակարդակում մրցունակ մնալու և զարգանալու հնարավորություն ընձեռելու նպատակով պետական աջակցություն տրամադրելու, ինչպես նաև պետական ու մասնավոր հատվածների համագործակցության միջոցով գիտելիքահենք տնտեսության զարգացման ուղղությամբ իրական հնարավորություններ ստեղծելու հրամայականով»,-ասված է հիմնավորման մեջ։
«Կառավարության առանձին որոշումներով աջակցության ծրագրեր են իրականացվում ոլորտում գործունեություն իրականացնող առանձին տնտեսավարող սուբյեկտների համար՝ պայմանավորված դեռևս 2022 թվականին ստեղծված իրավիճակով․ ոլորտային մի շարք ընկերությունների տեղափոխումը և մասնագետների ներհոսքը Հայաստան աննախադեպ աճի հնարավորություններ էր ընձեռել տեղեկատվական տեխնոլոգիաների զարգացման համար:
Գրանցվել է նաև ՀՀ-ում ՏՏ ոլորտի վարձու աշխատողների թվի շեշտակի աճ: Այսպես, 2022թ-ի փետրվարից մինչև 2023թ-ի դեկտեմբերն ընկած ժամանակահատվածում ՏՏ ոլորտի վարձու աշխատողների թիվը 21.5 հազարից հասել է 34 հազարի, ընդ որում, վարձու աշխատողների թվում օտարերկրացիների մասնաբաժինը 4.1%-ից հասել է 27.3%: Վարձու աշխատողների թվաքանակի հավելաճի առնվազն 44%-ը պայմանավորված է օտարերկրացիների ներհոսքով։ 2022թ-ի տարեվերջին ՏՏ ոլորտում գործել է վարձու աշխատող չունեցող 2,653 անհատ ձեռնարկատեր, որոնց թիվը 2023թ-ի տարեվերջին հասել է 4,834։ Հատկանշական է նաև այն փաստը, որ ՀՀ տեղափոխված ընկերություններից 9-ն ընդգրկված են ՀՀ ՏՏ ոլորտի 20 խոշոր գործատուների թվում․ դրանք են․
- «ՎԻԷՄ ԱՐՄԵՆԻԱ» ՍՊԸ
- «ԴԱՏԱԱՐՏ․ԱՄ» ՍՊԸ
- «ԷՊԱՄ ՍԻՍԹԵՄԶ» ՍՊԸ
- «ՔՎԱՆՏՈՐԻ ԱՄ» ՍՊԸ
- «ՆԵՔՍԹԸՐՍ ՍՏՈՒԴԻՈ ԱՐՄԵՆԻԱ» ՍՊԸ
- «ՏԻՆԿՈՖՖ ԾՐԱԳՐԱՅԻՆ ՄՇԱԿՄԱՆ ԿԵՆՏՐՈՆ» ՍՊԸ
- «ԲՕՍՏՕՆՋԵՆ ԹԵՔՆՈԼՈՋԻՍ» ՍՊԸ
- «ԸԼԱՅՆ ԹԵՔՆՈԼՈՋԻ» ՍՊԸ
- «Յ. Ե. ՀԱԲ ՀԱՅԱՍՏԱՆ» ՍՊԸ
Խնդիրը կայանում է նրանում, որ աջակցության գործող գործիքակազմը ոլորտի առաջանցիկ զարգացման և տեղափոխված ընկերությունների ու մասնագետների՝ Հայաստանից հնարավոր հեռանալը կանխելու համար բավարար չէ»։
Նախագիծը մշակող մարմինը փոխանցում է, որ անհրաժեշտություն է առաջացել որդեգրելու բարձր տեխնոլոգիական ընկերությունների զարգացման և աջակցության նոր մոտեցումներ, որոնք մի կողմից Հայաստանը գրավիչ կդարձնեն Հայաստան տեղափոխված ՏՏ ընկերությունների և մասնագետների համար, մյուս կողմից տեղական ընկերություններին կդարձնեն ավելի մրցունակ:
Լուսանկարը պատրաստվել է AI-ի միջոցով։
