Ազգային ժողովի «Քաղաքացիական պայմանագիր» խմբակցության 5 պատգամավոր, այդ թվում՝ Արմեն Խաչատրյանը, Անդրանիկ Քոչարյանը, Գուրգեն Մելքոնյանը, Վահագն Ալեքսանյանը և Հայկ Սարգսյանն առաջարկում են լրացում կատարել Քրեական օրենսգրքում։
Iravaban.net-ը հայտնում է, որ պատգամավորներն առաջարկում են օրենսգիրքը լրացնել նոր՝ 423․1-րդ հոդվածով և պատիժ նախատեսել ԱԺ քննիչ հանձնաժողովի հրավերով անհարգելի պատճառով հանձնաժողովի համապատասխան նիստերին չներկայանալու կամ հանձնաժողովի իրավասության ոլորտին վերաբերող անհրաժեշտ տեղեկությունները տրամադրելուց հրաժարվելու դեպքում։
Նախագծով նախատեսվում է նշված արարքը կատարելու համար նշանակել պատիժ տուգանք՝ քսանապատիկից հիսնապատիկի չափով, կամ հանրային աշխատանքներ՝ 150-250 ժամ տևողությամբ, կամ կարճաժամկետ ազատազրկում՝ 1-2 ամիս ժամկետով, կամ ազատազրկում՝ մինչև 2 տարի ժամկետով։
Պատգամավորները հույս ունենք, որ նախագծի ընդունմամբ կբարձրանա ԱԺ քննիչ հանձնաժողովների հեղինակությունը, կապահովվի դրանց գործունեության բնականոնությունը։
Մանրամասները՝ այստեղ։
