Հուլիսի 4-ին, ժամը 19:30-ից սկսած Ճգնաժամային կառավարման ազգային կենտրոն ահազանգեր են ստացվել, որ քամու հետևանքով Երևանի տարբեր վարչական շրջաններում կոտրվել են ծառեր, վնասվել թիթեղներ և գովազդային վահանակ:

Այս մասին հայտնում են ՆԳՆ փրկարար ծառայությունից։

Ըստ «Հիդրոօդերևութաբանության և մոնիթորինգի կենտրոն» ՊՈԱԿ-ի տրամադրած տեղեկության՝ քամու ուժգնությունը Երևանում հասել է մինչև 18 մ/վ-ի (առավելագույնը՝ Դավթաշեն վարչական շրջանում)։ Գրանցվել է քամու ուժգնացում նաև Արմավիրում՝ 16 մ/վ, Աշտարակում՝ 19 մ/վ և Եղվարդում՝ 20 մ/վ։

Հուլիսի 4-ին, ժամը 19:45-ին Կոտայքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Բալահովիտ գյուղում՝ «Օջախ» ռեստորանային համալիրի մոտակայքում, ծառի ճյուղը կոտրվել է և ընկել ավտոմեքենայի վրա․ անհրաժեշտ է փրկարարների օգնությունը:
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի օպերատիվ խումբը:
Պարզվել է, որ ծառի ճյուղը կոտրվել է և ընկել «Land Rover» մակնիշի ավտոմեքենայի վրա՝ վնասելով այն. տուժածներ չկան:
Փրկարարները սահմանազատել են տարածքը և ծառի ճյուղը (մոտ 20 մ) հեռացրել ավտոմեքենայի վրայից:

Հուլիսի 4-ին, ժամը 19:34-ին Ճգնաժամային կառավարման ազգային կենտրոն ահազանգ է ստացվել, որ Երևանի Արմենակյան փողոցում ուժեղ քամու հետևանքով ծառը պոկվել է և ընկել ճանապարհի երթևեկելի հատված․ անհրաժեշտ է փրկարարների օգնությունը։
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ:
Պարզվել է, որ Արմենակյան փողոցի թիվ 127 հասցեի մոտակայքում ծառը շրջվել է և միակողմանի փակել ճանապարհը։
Փրկարարները ծառը հեռացրել են ճանապարհի երթևեկելի հատվածից։