Նախքան հերթական կանչի մեկնելը՝ Երևանի «Շտապբուժօգնություն» ծառայության անձնակազմը՝ բժիշկներն ու վարորդները, պատվաստվում են գրիպի դեմ:
Այս մասին հայտնում են Երևանի քաղաքապետարանից:
«Պատվաստվում ենք, որպեսզի ոչ միայն մենք լինենք առողջ, այլև չվարակենք քաղաքացիներին»,-նշում են բժիշկները:
Սեզոնային գրիպով չհիվանդանալու, հիվանդանալու դեպքում բարդություններից խուսափելու համար պատվաստումը լավագույն և արդյունավետ միջոց է։ Երևանի «Շտապբուժօգնություն» ծառայությունում այսօրվանից մեկնարկել է ու դեռ մի քանի օր կշարունակվի գրիպի դեմ պատվաստման գործընթացը:
«Սեզոնային գրիպի հետ կապված կանչերի թիվն զգալորեն ավելանում է, և գործն էլ դառնում ավելի ծանրաբեռնված: Մեր աշխատակազմն ընդհանուր առմամբ մոտ 700 հոգի է: Հաշվի առնելով, որ աշխատանքը հերթափոխային է, պատվաստումը կազմակերպում ենք փուլային: Այսօր պատվաստվել է 70 աշխատակից»,-նշել է «Շտապբուժօգնություն» ՓԲԸ-ի տնօրենի տեղակալ Համազասպ Նահատակյանը:
Հատուկ հակացուցում պատվաստման համար չկա. կարևոր է, որ քաղաքացին այդ պահին չունենա հիվանդության սրացում: Նախքան պատվաստումը կատարվում է ջերմաչափում, չափվում է նաև ճնշումը, ստուգվում թթվածնային հագեցվածությունը:
Բուժանձնակազմի հետ տեղում պատվաստվել են նաև շտապբուժօգնության գլխավոր ենթակայան այցելած Երևանի քաղաքապետի տեղակալ Գևորգ Սիմոնյանը, քաղաքապետարանի աշխատակազմի առողջապահության վարչության պետի ժ/պ Յակով Ասատրյանը, նաև Երևանի ավագանու անդամ Թեհմինա Վարդանյանը:
«Առհասարակ շատ կարևոր են բոլոր պատվաստումները: Այստեղ կարևոր է հատկապես այն, որ առաջնահերթորեն պատվաստվում է շտապօգնության անձնակազմը, որն անմիջականորեն ռիսկի խմբում է և ինքն էլ կարող է տարածող հանդիսանալ: Այս քայլով կանխում ենք նաև այդ ռիսկը: Մեր մասնակցությամբ փորձեցինք նաև քաջալերել ու աջակցել»,- ընդգծել է Գևորգ Սիմոնյանը:
Պատվաստվել կարող են բոլորը՝ թե՛ մեծերը և թե՛ փոքրերը: Պատվաստումն իրականացվում է Երևանի համայնքային բոլոր պոլիկլինիկաներում՝ ֆրանսիական արտադրության դեղամիջոցով: Առողջապահության առաջնային օղակի բուժանձնակազմերն այս օրերին ևս պատվաստվում են:
