Հրավառություններ կազմակերպում են մեծ ու փոքր բոլոր բնակավայրերում, ու թվում է, թե բոլորին է համակել առիթով կամ անառիթ հրավառություններ անելու մոլուցքը՝ հաճախ նաև լռության ժամի կանոնների խախտմամբ:
Այս մասին հայտնում են ոստիկանությունից։
Հենց նման մի հրավառության հետքով շտապեցին ոստիկանության Գորիսի բաժնի ծառայողները, և օգոստոսի 19-ին, գիշերվա ժամը 1-ին, Գրիգոր Տաթևացու հրապարակից բաժին բերեցին Գորիսի Սաթյան փողոցի բնակիչ, 52-ամյա մի տղամարդու: Արձանագրվեց, որ նա հրագործական արտադրատեսակներ օգտագործելով` խախտել էր լռության ժամի պահանջը, զանցանք, որի որակումը տրված է Վարչական իրավախախտումների վերաբերյալ օրենսգրքի 180-րդ հոդվածով:
Նման արարք կատարողների նկատմամբ, իհարկե, միշտ էլ կկիրառվի վարչական ներգործության միջոց, սակայն վստահ ենք, որ հրավառությունների այս համաճարակը հնարավոր է կանխել միայն մարդկանց իրավագիտակցությունը բարձրացնելու միջոցով:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
