Հունիսի 27-ին ԱԺ արտահերթ նիստում քննարկվել է Վճռաբեկ դատարանի հակակոռուպցիոն պալատի քաղաքացիական գործերի քննության դատական կազմի դատավորի թափուր տեղի համար առաջադրված թեկնածուների ընտրության հարցը:
Բարձրագույն դատական խորհուրդը վերոնշյալ պաշտոնում առաջադրել է Լուսինե Ավագյանի, Գևորգ Գյոզալյանի և Վահե Ռաֆայելյանի թեկնածությունները:
Թեկնածուների կենսագրական տվյալներն ու անցած ուղին ներկայացրել է ԲԴԽ անդամ Դավիթ Խաչատուրյանը:
Թեկնածու Վահե Ռաֆայելյանը ներկայացրել է իր տեսլականը ձևավորվող մասնագիտացված հակակոռուպցիոն նոր դատարանների, բարձրագույն դատական ատյանի՝ արդարադատության ոլորտում ստանձնելիք բացառիկ կարևոր դերի ու առաքելության, ինչպես նաև այդ դատական կազմում բարձր և պատասխանատու պաշտոնի համար իր կողմից հայտ ներկայացնելու հիմքերի ու պատճառների մասին:
Թեկնածուի խոսքով՝ տվյալ պաշտոնում իր թեկնածությունը ներկայացնելու հիմքը բովանդակային առումով վերջին 20 տարիներին կուտակված և զարգացրած գիտական և տեսական գիտելիքների, ինչպես նաև գործնական աշխատանքում ձեռք բերած որոշակի փորձի, հմտությունների ու կարողությունների անհրաժեշտ ու բավարար պաշարի առկայությունն է: Վահե Ռաֆայելյանը վստահեցրել է, որ ԱԺ-ի կողմից լիազորվելու դեպքում, պատվով կկատարի բարձրագույն դատական ատյանի դատավորի սահմանադրական առաքելությունը՝ ի բարօրություն ժողովրդի և ի փառս Հայաստանի Հանրապետության:
Գևորգ Գյոզալյանը, նշելով, որ արդարադատությունն արդարության հասնելու գործիք է, ներկայացրել է արդարության, արդարադատության, ճշմարտության իր պատկերացումները: «Ճշմարտությունն է, որ ինձ ուժ է տալու արդարադատության միջոցով հաստատելու և հռչակելու արդարությունը: Մեր արդարադատությունների գերակշիռ մասը պետք է հաստատի ու հռչակի արդարությունը: Միայն արդարության հռչակումը կարդարացնի արդարադատական համակարգի գոյությունը և կենսունակությունը և որպես վերջնարդյունք՝ ՀՀ-ում անձը կլինի պաշտպանված»,- ասել է նա: Գևորգ Գյոզալյանն ընդգծել է, որ ստվերային արդարադատությունը չպետք է տեղ ունենա ՀՀ-ում և այն արմատախիլ պետք է արվի հիմնովին:
Թեկնածու Լուսինե Ավագյանն արտահերթ նիստին ներկա չի եղել:
Ազգային ժողովը հունիսի 28-ին՝ ժամը 11:00-ին, կշարունակի արտահերթ նստաշրջանի աշխատանքը:
