«Դոմինո Վիդեո Փրոդաքշն» ընկերության նախկին համահիմնադիր Արամ Հարությունյանը ՀՀ տնտեսական մրցակցության պաշտպանության պետական հանձնաժողով է ներկայացրել դիմում, հայտնելով, որ 2009 թվականին իր, Ֆրանսիայի քաղաքացի Սևակ Սերոբյանի և Աշոտ Առաքելյանի կողմից ստեղծվել է «Դոմինո Վիդեո Փրոդաքշն» ընկերությունը՝ համապատասխանաբար 34, 33 և 33 տոկոս բաժնեմասերով: Գործունեության երկու տարիների ընթացքում ընկերությունը իրականացրել է մի շարք միջոցառումներ, որոնց թվում նաև «Գոհար» և «Հայաստանի աստղերը» համերգային ծրագրերի կազմակերպումը:

Սակայն հիմնադիրների միջև ծագած անհաշտության արդյունքում 2013-ի փետրվարին կայացվել է ընկերությունը լուծարելու որոշում: Արամ Հարությունյանը հայտնել է, որ հիմնադիրներից մեկը՝ Աշոտ Առաքելյանը, ստեղծել և գրանցել է «Դոմինո Փրոդաքշն» ՍՊԸ և համատեղ հիմնադրված և արդեն լուծարման փուլում գտնվող «Դոմինո Վիդեո Փրոդաքշնի» կատարած բոլոր գործերն ու մրցանակները վերագրել է իր ընկերությանը, և, փաստորեն, ըստ դիմումատուի, սուտ տեղեկատվության միջոցով օգտագործել «Դոմինո Վիդեո Փրոդաքշնի» բարի համբավը:

ՏՄՊՊՀ ուսումնասիրությամբ հաստատվել է հետևյալը. «Դոմինո Վիդեո Փրոդաքշնի» իրականացրած աշխատանքները՝ տեսահոլովակները, լուսանկարները, ինչպես նաև
մրցանակները, որպես «Դոմինո Փրոդաքշնի» աշխատանքի արդյունք ներկայացնելը, ինչպես նաև կեղծ տեղեկություներ հրապարակելը կարող է մոլորեցնել հասարակությանը, ինչը անբարեխիղճ մրցակցության դրսևորում է:

Ինչպես հայտնում է ՀՀ տնտեսական մրցակցության պաշտպանության պետական հանձնաժողովի կայքը` նիստում որոշվեց «Դոմինո Փրոդաքշն» ընկերության հանդեպ կիրառել տուգանք՝ նախորդ տարվա հասույթի 1 տոկոսի չափով, որն օրենքով նախատեսված առավելագույն պատժաչափն է, միաժամանակ հանձնարարելով 1 շաբաթյա ժամկետում վերացնել հայտնաբերված խախտումները:

Իրավաբան.net