Էրեբունի և Նուբարաշեն վարչական շրջանների ընդհանուր իրավասության դատարանը քննության է առել քրեական գործն ըստ մեղադրանքի Միքայել Դ.-ի (անունը փոխված է) :

Վերջինիս մեղադրվում է ՀՀ քրեական օրենսգրքի 118-րդ և 120-րդ հոդվածներով  նախատեսված հանցագործությունների կատարման համար:

Նշենք, որ  ՀՀ քրեական օրենսգրքի  118-րդ հոդվածը սահմանում է.  ծեծելը կամ այլ բռնի գործողություններ կատարելը, որը չի առաջացրել նույն օրենսգրքի 117-րդ հոդվածով նախատեսված հետևանքներ, պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ կալանքով՝ առավելագույնը երկու ամիս ժամկետով:

Իսկ ՀՀ քրեական օրենսգրքի 120-րդ հոդվածը սահմանում է, որ  անզգուշությամբ մեկ ուրիշի առողջությանը ծանր վնաս պատճառելը պատժվում է տուգանքով՝ նվազագույն աշխատավարձի առավելագույնը երկուհարյուրապատիկի չափով, կամ կալանքով՝ մեկից երկու ամիս ժամկետով:

Միքայելը 22.11.2011թ. Երևան քաղաքում գործող  «Նոր Զովք» սուպերմարկետներից մեկում կենցաղային հարցերի շուրջ վիճաբանել է կնոջ` Զարուհու (անունը փոխված է) հետ, որի ընթացքում երկու անգամ ձեռքով հարվածել է նրա գլխին` պատճառելով ֆիզիկական ցավ:

Բացի այդ, 01.06.2012թ. Երևան քաղաքի փողոցներից  մեկի միջնամասում  բռունցքով հարվածել է Լևոն  Ս.-ի (անունը փոխված է) դեմքի ձախ հատվածին, որի արդյունքում վերջինս վայր է ընկել ու անզգուշությամբ ստացել առողջության ծանր վնաս:

Մեղադրյալի  նկատմամբ խափանման միջոց է ընտրվել ստորագրություն չհեռանալու մասին:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Աղբյուրը` Իրավաբան.net