Արմավիրի մարզի ընդհանուր իրավասության առաջին ատյանի դատարանը հիմնավորված է համարել ապօրինի ձեռնարկատիրություն իրականացնելու, այն է` առանց հատուկ թույլտվության խաղային ապարատներ շահագործելու եւ եկամուտ ստանալու համար Ա.Հովհաննիսյանին առաջադրված մեղադրանքը եւ նրան դատապարտել ազատազրկման:

Ավելի վաղ Իրավաբան.net-ն անդրադարձել էր այդ քրեական գործին` նշելով, որ շահագործելով երկու դրամական շահումով ավտոմատներ` դրա հետևանքով պետությանը պատճառել է առանձնապես խոշոր չափի` 5.260.000 դրամի վնաս:

Գլխավոր դատախազության փոխանցմամբ` դատարանում հետազոտված եւ հիմնավոր համարված ապացույցների համաձայն` Ա.Հովհաննիսյանը 2009-2010թթ. մեկնել է ՌԴ եւ Մոսկվայում բնակվելու ընթացքում ձեռք բերել «Casino» եւ «Счастливое число» խաղային ապարատներ, դրանք մասնատել եւ 2010թ. նոյեմբերի 19-ին տեղափոխել է Հայաստան:

Ա.Հովհաննիսյանը 2011թ.սեպտեմբերի 15-ին նշված ապարատներն ինքնուրույն հավաքել է եւ տեղադրել Արմավիրի մարզի Նորապատ համայնքի գյուղատնտեսական մթերքների շուկայի տարածքում: Չունենալով հատուկ թույլտվություն նա դրանք շահագործել է մինչեւ նույն թվականի հոկտեմբերի 13-ը եւ եկամուտ ստացել:

Ա.Հովհաննիսյանը դատաքննության ընթացքում զղջացել է կատարած հանցանքի համար եւ խնդրել իրեն ժամանակ տրամադրել` պետությանը պատճառված վնասը հատուցելու համար:

Ձեռք բերված ապացույցների հիման վրա Արմավիրի մարզի ընդհանուր իրավասության առաջին ատյանի դատարանի` 2013թ. մարտի 13-ի դատավճռով Ա.Հովհաննիսյանը մեղավոր է ճանաչվել ՀՀ քրեական օրենսգրքի 188-րդ հոդվածի 3-րդ մասի 1-ին կետով եւ դատապարտվել ազատազրկման` 2 տարի ժամկետով` նրան զրկելով լիցենզավորման ենթակա ձեռնարկատիրական գործունեությամբ զբաղվելու իրավունքից` 1 տարի ժամկետով:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Աղբյուրը` Իրավաբան.net