Շենգավիթ վարչական շրջանի ընդհանուր իրավասության դատարանում քննության է առնվում նախկինում դատվածություն չունեցող Գևորգ Բ.-ի դեմ հարուցված քրեական գործը:

Նրան մեղադրանք է առաջադրվել այն բանի համար, որ նա 2012թ. հուլիսի 25-ին` ժամը 22:30-ի սահմաններում, Երևան քաղաքի Արարատյան փողոցի 1-ին նրբանցքի թիվ X տանը կենցաղային հարցերի շուրջ վիճաբանության մեջ է մտել իր կնոջ` Մերի Հ.-ի հետ, որի ընթացքում ապակե բաժակով հարվածել է Մերի Հ.-ի ձախ ձեռքին` վերջինիս առողջությանը դիտավորությամբ պատճառելով թեթև վնասի հատկանիշներ պարունակող վնասվածքներ, առողջության կարճատև քայքայումով:

Մեղադրյալի նկատմամբ որպես խափանման միջոց ընտրվել է ստորագրություն չհեռանալու մասին, իսկ դատարանում մեղադրանքը պաշտպանվում է Շենգավիթ վարչական շրջանի դատախազության դատախազ Կ. Ադամյանի կողմից:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Աղբյուրը՝ Իրավաբան.net