«Վագա-Ֆարմ» ՍՊԸ հայցադիմում էր ներկայացրել ՀՀ վարչական դատարան ընդդեմ ՀՀ առողջապահության նախարարության` 11.04.2012թ. տրված թիվ 006323 ներմուծման հավաստագիրը` «Հատուկ նշումներ» մասով և ՀՀ առողջապահության նախարարի 12.04.2012թ. թիվ 761 հրամանն անվավեր ճանաչելու և ՀՀ առողջապահության նախարարությանը «Վագա-Ֆարմ» ՍՊԸ-ին «Քոլդրեքս կիտրոնի համով 750մգ+10մգ+60մգ, 5գ փաթեթիկներ (10) ներքին ընդունման լուծույթի դեղափոշի» դեղի ներմուծման հավաստագիր տալուն պարտավորեցնելու պահանջների մասին։
Նշենք, որ «Վագա-Ֆարմ» ՍՊ ընկերությունը Հայաստանի Հանրապետություն է ներկրել «Քոլդրեքս կիտրոնի համով 750մգ+10մգ+60մգ, 5գ փաթեթիկներ (10) ներքին ընդունման լուծույթի դեղափոշի» դեղը։ ՀՀ առողջապահության նախարարությունը 12.04.2012թ. թիվ 761-Ա հրամանով մերժել է դեղերի ներմուծումը։
Նախարարությունը դատարան ներկայացված հայցադիմումի պատասխանով հայտնում է, որ ներկրված դեղի (Քոլդրեքս կիտրոնի համով` Coldrex o smaku cytrynowym, (paracetamolum+phenylephini hydrochloridum+acidum ascorbicum (750mg+10mg+60mg/ 5g) արտաքին փաթեթների վրա և ներդիր թերթիկում առկա են հետևյալ գրառումները «Podmiot Odpowiedzialny։ GlaxoSmithKline Cosumer Healthcare Sp.z.o.o., A.Armii Ludowej 26, 00-609 Warsawa, իսկ ներդիր թերթիկում նաև «Wytworca։Smithkline BEEcham S.A Ctra. De Ajalvir, Km 2500, 28806 Alcala de Henares, Madryt, Hiszpania գրառումները։ Համապատասխան դեղի ներմուծումը մերժելու համար հիմք է հանդիսացել ՀՀ կառավարության 2000 թվականի սեպտեմբերի 20-ի 581 որոշմամբ հաստատված՝ «Հայաստանի Հանրապետություն դեղերի և դեղանյութերի ներմուծման և արտահանման» կարգի 40-րդ կետի բ) ենթակետի պահանջը, որի համաձայն` ՀՀ-ում դեղերի և դեղանյութերի ներմուծումն ու արտահանումը մերժվում են, եթե ներմուծվող դեղերը ՀՀ-ում պետական գրանցում չունեն։
Նախարարության կողմից ներկայացված ՀՀ դեղերի պետական գրանցամատյանի (ռեեստրի) գրանցված դեղերի թվով 11 (տասնմեկ) վավերապայմանի 6-րդ սյունակում որպես նշված դեղի արտադրող նշված է ՍմիթԿլայն Բիչեմ Ս.Ա., ԳլաքսոՍմիթԿլայն Քոնսումեր ՀելթՔեյր (Միացյալ Թագավորություն)-ի համար, SmithKline Beecham S.A. (for GlaxoSmithKline Consumer HealthCare, UK), իսկ 7-րդ սյունակում որպես երկիր նշված է Իսպանիան։
Նախարարությունը ներկվող դեղի պարագայում որևէ փաստաթղթային տարբերություն չի հայտնաբերել, կամ տարբերություններ հայտնաբերելով հանդերձ դրանք էական չի համարել, քանի որ, ի վերջո, կայացրել է դեղը լաբորատոր փորձաքննության նշանակելու մասին որոշումը։ Մինչդեռ, փորձագիտական եզրակացության ուսումնասիրությունից պարզվում է, որ փորձագետը վիճելի ներկրվող դեղի առումով որևէ բովանդակային տարբերություններ չի գրառել` պարզապես նշելով, որ ներկրվող դեղը գրանցված չէ ՀՀ-ում։
Սույն գործով Դատարանը հայցը բավարարել է ամբողջությամբ, և վճռել է անվավեր ճանաչել ՀՀ առողջապահության նախարարության` 11.04.2012թ. տրված թիվ 006323 ներմուծման հավաստագիրը` «Հատուկ նշումներ» մասով։ Անվավեր ճանաչել ՀՀ առողջապահության նախարարի 12.04.2012թ. թիվ 761 հրամանը, և որպես անվավերության հետևանք` ՀՀ առողջապահության նախարարությանը պարտավորեցնել «Վագա-Ֆարմ» ՍՊԸ-ին տրամադրել «Քոլդրեքս կիտրոնի համով 750մգ+10մգ+60մգ, 5գ փաթեթիկներ /10/ ներքին ընդունման լուծույթի դեղափոշի» դեղի ներմուծման հավաստագիր։
Սույն վճիռը պատասխանող ՀՀ առողջապահության նախարարությունը բողոքարկել է Վերաքննիչ վարչական դատարան:
Աղբյուրը` Իրավաբան.net
