Հունվարի 11-ին Լոռու մարզի ընդհանուր իրավասության դատարան ստացվել է քրեական գործ, որում N զորամասի 2 պայմաանգրային զինծառայող և նրանց վերադասը ներգրավված են որպես մեղադրյալներ:
Նախագահող դատավորը Սուրեն Բաղդասարյանն է:
Այս մասին տեղեկանում ենք «Դատալեքս» դատական տեղեկատվական համակարգից:
N զորամասի պայամանգրային զինծառայող Ա. Հակոբյանին և Դ. Նավոյանին մեղադրանք է առաջադրվել 2018 թվականի հունիսի 20-ին, ժամը 21:45-ի սահմաններում իրենց պետ Հ. Ասլանյանի հետ վիճաբանելու և նրա նկատմամբ բռնություն գործադրելու համար՝ առողջությանը պատճառելով թեթև վնասի հատկանիշներ չպարունակող մարմնական վնասվածքներ:
Հ. Ասլանյանն էլ մեղադրվում է Նավոյանի և Հակոբյանի հետ վիճաբանելու համար: Նա, լինելով ՀՀ ՊՆ N զորամասի 3-րդ հրաձգային գումարտակի հրամանատարի նյութատեխնիկական ապահովման գծով տեղակալ, պետ, պայմանագրային զինծառայող Դ. Նավոյանին տվել է սեռական բնույթի հայհոյանքներ և բռնություն գործադրել նրա նկատմամբ՝ առողջությանը պատճառելով թեթև վնասի հատկանիշներ չպարունակող մարմնական վնասվածքներ:
Բացի այդ, Ասլանյանը ծեծի է ենթարկել պայմանագրային զինծառայող Հ. Հովհաննիսյանին՝ առողջությանը պատճառելով թեթև վնասի հատկանիշներ չպարունակող մարմնական վնասվածք:
Բոլորի նկատմամբ խափանման միջոց է ընտրվել ստորագրությունը՝ չհեռանալու մասին:
3-ն էլ նախկինում դատվածություն չեն ունեցել:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
