Փոխվարչապետի պաշտոնակատար Տիգրան Ավինյանի գրասենյակի ղեկավար Սերժ Վարագ Սիսեռյանը հայտնում է. «Այսօր կառավարությունում ընդունեցինք «Նաիրիտի» աշխատակիցների պատվիրակությանը: Բացի ինձնից, հանդիպմանը ներկա էին Էներգետիկայի և բնական պաշարների նախարարի տեղակալ Տիգրան Արզումանյանը, վարչապետի պաշտոնակատարի օգնական Նաիրի Սարգսյանը և Էներգետիկայի ու բնական պաշարների նախարարության Ֆինանսատնտեսագիտական վարչության պետ Բորիս Գյուլումյանը:
«Նաիրիտի» աշխատակիցները ներկայացրեցին իրենց պահանջները և խնդիրները՝ մասնավորապես աշխատավարձի տոկոսների վճարման առումով:
Ներդրումների ներգրավման միջոցով «Նաիրիտի» վերագործարկման հարցով այսօր հանդիպեցի նաև գործարանի նախկին տնօրեն Կարեն Իսրայելյանի հետ: Նշեմ, որ այս առումով կառավարությունը, բնականաբար, բաց է առաջարկությունների համար և պոտենցիալ ներդրողի հետ արդեն իսկ տեղի է ունեցել նախնական հանդիպում: Այժմ պետք է ընթանան մանրամասն բանակցություններ տարբեր շահագրգիռ գերատեսչությունների հետ, և համաձայնության գալու դեպքում կսկսվի համապատասխան ներդրումային գործընթաց»:
