«Մարդու իրավունքների ամերիկյան կոնվենցիան չեղյալ հայտարարելու վերաբերյալ Վենեսուելայի կառավարության որոշումը, և դրա հիման վրա Միջ-ամերիկյան դատարանից դուրս գալը անարգանք է մարդու իրավունքների խախտման զոհերի նկատմամբ,» հայտարարել է Amnesty International-ը։
Երեքշաբթի օրը Ամերիկյան պետությունների կազմակերպության (ԱՊԿ) գլխավոր քարտուղար Խոսե Միգել Ինսուլսան հաստատել է, որ ստացել է Մարդու իրավունքների ամերիկյան կոնվենցիայի անդամությունից և Մարդու իրավունքների Միջամերիկյան դատարանից դուրս գալու վերաբերյալ Վենեսուելայի կառավարության դիմումը և նշել, որ ԱՊԿ-ն մեկ տարվա ընթացքում կդիտարկի այն։
Այս քայլը նշանակում է, որ Վենեսուելայում մարդու իրավունքների խախտման զոհերը չեն կարողանա իրենց բողոքն ուղղել տարածաշրջանային դատարանին։
«Այս քայլը անարգանք է` ուղղված մարդու իրավունքների խախտման զոհերին և Վենեսուելայի ապագա սերունդներին, ովքեր զրկվում են այս տարածաշրջանային մարմնին դիմելու հնարավորությունից այն ժամանակ, երբ նրանց իրավունքները պաշտպանություն չեն գտնի իրենց սեփական երկրում,» հայտարարել է Amnesty International-ի Ամերիկյան տարածաշրջանի ծրագրի տնօրեն Գվադալուպե Մարենգոն։
Մարդու իրավունքների տարածաշրջանային և ազգային համակարգերը ստեղծված են արդարադատության և մարդու իրավունքների խախտումների դեպքերում փոխհատուցում ապահովելու, երբ ազգային արդարադատության համակարգերը իրենց նպատակին չեն ծառայում:
Մարդու իրավունքների տարածաշրջանային համակարգը, որն իր մեջ ներառում է Մարդու իրավունքների գծով Միջամերիկյան հանձնախումբն ու Միջամերիկյան դատարանը, ամբողջ Ամերիկա մայրցամաքում պաշտպանության ներպետական միջոցների կարևոր բաղադրիչ է հանդիսանում։
Կառավարության որոշումը ուժի մեջ մտնելուց հետո Վենեսուելայի բնակիչները այլևս Ամերիկյան մայրցամաքի մարդու իրավունքների պաշտպանության բարձրագույն մարմնին՝ Միջամերիկյան դատարանին դիմելու հնարավորություն չեն ունենա։