Կառավարության այսօրվա նիստին ԱԻ նախարար Արմեն Երիցյանը ներկայացրեց Ռուսաստանի Դաշնությունում Հայաստանի Հանրապետության դեսպանությանը կից Հայաստանի Հանրապետության արտակարգ իրավիճակների նախարարության ներկայացուցչի կարգավիճակն ու գործունեության կարգը հաստատելու մասին հարցը:
Նախագծով առաջարկվում է սահմանել, որ` Ռուսաստանի Դաշնությունում Հայաստանի Հանրապետության դեսպանությանը կից գործում է Հայաստանի Հանրապետության արտակարգ իրավիճակների նախարարության ներկայացուցիչ, ում կարգավիճակը հավասարեցվում է Ռուսաստանի Դաշնությունում Հայաստանի Հանրապետության դիվանագիտական ներկայացուցչության խորհրդականի կարգավիճակին:
Բացի այդ, հաստատվելու է Հաստատել Ռուսաստանի Դաշնությունում Հայաստանի Հանրապետության դեսպանությանը կից Հայաստանի Հանրապետության արտակարգ իրավիճակների նախարարության ներկայացուցչի գործունեության կարգը:
Նշվում է նաև, որ Նախագծի ընդունմամբ Ռուսաստանի Դաշնությունում Հայաստանի Հանրապետության արտակարգ իրավիճակների նախարարության ներկայացուցչին կտրվի դիվանագիտական կարգավիճակ, կբարելավվի և կկարգավորվի հետևյալ խնդիրների իրականացման արդյունավետությունը`
– Հայաստանի Հանրապետության տարածքում տեղակայված հայ-ռուսական հումանիտար արձագանքման կենտրոնի հայկական մասը կներկայացվի Ռուսաստանի Դաշնության համապատասխան մարմիններում.
– զարկ կտրվի Հայաստանի Հանրապետության տարածքում միասնական պետական ռեզերվների ստեղծման և կառավարման աշխատանքներին.
– կբարձրանա կողմերի միջև իրականացող տարաբնույթ տարերային և տեխնածին աղետների կանխման, հնարավոր հետևանքների նվազեցման ու վերացման, քաղաքացիական պաշտպանության ոլորտներում համագործակցության այլ աշխատանքների արդյունքը.
– կնպաստի կողմերի միջև հակահրդեհային ծառայության և հրդեհային հսկողության, տեխնիկական անվտանգության, սեյսմիկ պաշտպանության, հիդրոօդերևութաբանական գործունեության, մթնոլորտային երևույթների վրա ակտիվ ներգործության աշխատանքների կազմակերպման և իրականացման բնագավառներում համագործակցության իրականացմանը ու զարգացմանը:
Նախագծի մասին զեկույցը լսելուց հետո Հովիկ Աբրահամյանն առաջարկեց հարցի քննարկումը հետաձգել մինչև նախագահ Սերժ Սարգսյանի վերդարձը. «Պարոն Երիցյան, հարցը հետաձգենք, որոշ հարցեր կան նախագահականի հետ ճշտելու, թյուրըմբռնում է եղել: Նախագահը վերադառնա, կքննակենք»,- ասաց վարչապետ Հովիկ Աբրահամյանը:
