2015 թվականի սեպտեմբերի 21-ին` ժամը 22:00-ի սահմաններում, քաղաքացի Դանիել Թ.-ն անգիտակից վիճակում շտապօգնության մեքենայով տեղափոխվել է «Արմենիա» հանրապետական բժշկական կենտրոնի վերակենդանացման բաժանմունք, որտեղ նույն օրը` ժամը 23:00-ի սահմաններում, գիտակցության է եկել ու հասարակական կարգը կոպիտ կերպով խախտելու դիտավորությամբ, հայհոյանքներ է հնչեցրել և ապտակել նույն բաժանմունքի աշխատակցին, պատռել է վերջինիս տաբատը, բռունցքներով հարվածներ է հասցրել իրեն բուժող բժշկին, բժշկական մետաղյա ձողով հարվածել ու վնասել է հիշյալ բաժանմունքի դուռը:
Այնուհետև քաղաքացի Դանիել Թ.-ն բռնություն է կիրառել իր անօրինական գործողությունները կանխող, հիշյալ բժշկական կենտրոնում ծառայություն իրականացնող ոստիկանի նկատմամբ: Տևական ժամանակ Դանիել Թ.-ն չի ենթարկվել ոստիկանի օրինական պահանջներին, շարունակել է բռնություն կիրառել վերջինիս նկատմամբ, որի ընթացքում ոստիկանն իրեն ամրակցված ատրճանակից կրակոց է արձակել, ինչի հետևանքով Դանիել Թ.-ն ստացել է մարմնական վնասվածք:
Դեպքի առթիվ ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում ՀՀ քրեական օրենսգրքի 258-րդ հոդվածի 3-րդ մասի 2-րդ կետով և 316-րդ հոդվածի 1-ին մասով հարուցվել է քրեական գործ և շուրջ 7 ամիս կատարվել նախաքննություն:
Հետագայում ՀՀ գլխավոր դատախազը գործի փաստական հանգամանքներով պայմանավորված՝ լրիվ, օբյեկտիվ և բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկել ՀՀ հատուկ քննչական ծառայություն:
Նախաքննությունը շարունակվում է:
Այս մասին տեղեկացնում են Հատուկ քննչական ծառայությունից:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
