Արդեն խոսել են այն մասին, որ Հայաստանի Հանրապետությունում արգելվում է օրգանների առուվաճառքը, ինչպես նաև այն դեպքերի մասին, թե երբ կենդանի անձը կամ դիակը կարող են հանդես գալ որպես օրգանների փոխպատվաստման դոնոր (տես Իրավաբան.net-ի 15.08.2012 և 29.08.2012  հոդվածներում) :
Այժմ անդրադառնանք այն դեպքերին, երբ օրենքն արգելում է փոխպատվաստման նպատակով օրգաններ և (կամ) հյուսվածքներ վերցնել:
Փոխպատվաստման նպատակով օրգաններ և (կամ) հյուսվածքներ վերցնելը քաղաքացուց (կենդանի դոնորից) չի թույլատրվում, եթե՝
ա) չի լրացել քաղաքացու 18 տարին (բացառությամբ ոսկրածուծի փոխպատվաստման դեպքի).
բ) քաղաքացին սահմանված կարգով ճանաչված է հաշմանդամ.
գ) քաղաքացին հղի է.
դ) քաղաքացին պատիժ է կրում ազատազրկման վայրում, բացառությամբ, եթե ռեցիպիենտն ազատազրկված անձի մերձավոր ազգականն է (ծնող, զավակ, ամուսին, քույր, եղբայր).
ե) պատանդ է.
զ) լրացել է քաղաքացու 65 տարին:

Օրգաններ վերցնելը չի թույլատրվում, եթե պարզվել է, որ դրանք պատկանում են անձի, որը տառապում է ռեցիպիենտի կյանքին և առողջությանը վտանգ ներկայացնող հիվանդությամբ:

Կենդանի դոնորին օրգաններ տալու համաձայնությանը հարկադրող ցանկացած անձ ենթակա է քրեական պատասխանատվության:

Ազատազրկման վայրում գտնվող անձից փոխպատվաստման նպատակով օրգաններ և (կամ) հյուսվածքներ վերցնելու պայմանները, ինչպես նաև օրգանը և (կամ) հյուսվածքը վերցնելուց հետո ազատազրկման վայրում գտնվող անձի բժշկական օգնության և խնամքի մատուցման պայմանները հաստատում է Հայաստանի Հանրապետության կառավարությունը:

Աղբյուրը` Իրավաբան.net