Քիչ առաջ դատավոր Լևոն Ավետիսյանը մերժեց ազատամարտիկ Վոլոդյա Ավետիսյանի գործով ինքնաբացարկ հայտնելու մասին պաշտպան Արա Զաքարյանի միջնորդությունը:
Որոշման եզրափակիչ մասը լսելուց հետո՝ նիստերի դահլիճից միաբերան բղավեցին. «Ամոթ, ամոթ»:
Ամբաստանյալ Վոլոդյա Ավետիսյանը հանդես եկավ հայտարարությամբ՝ նշելով, որ «Նուբարաշեն» քրեակատարողական հիմնարկում իր նկատմամբ լավ վերաբերմունք ցույց չեն տալիս. բժիշկներն իր մոտ հիվանդություն են հայտնաբերել, բայց երկար ժամանակ է բուժում չեն նշանակում: Նրան տեսակցության այցելած Ազգային ժողովի պատգամավոր Նիկոլ Փաշինյանին, ապա Մարդու իրավունքների պաշտպանի գրասենյակի աշխատակցին ևս հայտնել է, որ ուշադրություն չեն դարձնում: Միայն դրանից հետո են բժիշկները դեղորայք նշանակել:
Դատավոր Լևոն Ավետիսյանը հայտնեց, որ ինքը ևս գրություն կուղարկի ՔԿՀ-ի ադմինիստրացիային, որպեսզի ուշադիր լինեն:
Դատական նիստը շարունակվում է:
