Այս գործի մյուս նիստերը՝
բացել բոլորը
Փակել

Այս գործը մեզ վրա «կարված» է. ամբաստանյալ Արամ Մուղալյան

Ինչպե՞ս կարելի է 1 մարդու ցուցմունքով 4 մարդու 4 դրվագով դատել: Ընդ որում՝ երեք դրվագով ոչ մի վկա ոչ մեկի դեմքը չի տեսել, ոչ մի ապացույց չկա: Այս մասին այսօր վերաքննիչ բողոքի քննության ժամանակ դատարանին ասաց Քեմբրիջի շրջանավարտ Արամ Մուղալյանը:

«Կա 4 դրվագ և կա 1 վկայի ցուցմունք, որը 4 դրվագից 1-ում ասում է, որ դեպքի վայրում ավտոմեքենա է տեսել, և այդ ավտոմեքենայի թվերից մի քանիսն է միայն իմ ավտոմեքենայի թվերի հետ բռնում,- նշեց Արամ Մուղալյանն ու հավելեց,- Մի տեսագրություն ունեն, բայց փորձագետը հայտնել է, որ ո´չ ավտոմեքենայի համարն է երևում, ո´չ անձինք են երևում՝ պարզ չէ, թե ինչ ավտոմեքենա է»:

Արամ Մուղալյանի խոսքով՝ դատախազությունը 2012 թվականին տուժողի եղբոր խոտի դեզի այրվելու չբացահայտված դեպքն էլ է փորձել իրենց վրա «կարել», սակայն չի ստացվել: Քեմբրիջի շրջանավարտի կարծիքով՝ այս գործը ևս իրենց վրա «կարված» է:

Այսօր Վերաքննիչ քրեական դատարանում ամբաստանյալ Արամ Մուղալյանի պաշտպան Վահե Գաբրիելյանը շարունակեց դատարանին ներկայացնել նախորդ դատական նիստի ժամանակ կիսատ մնացած վերաքնննիչ բողոքը: Նա կես ժամից ավելի ներկայացրեց փաստարկներ դատավճռի անօրինականության վերաբերյալ և խնդրեց դատարանին բեկանել դատավճիռը, կայացնել արդարացման դատավճիռ:

Դատարանին վերաքննիչ բողոք ներկայացրեց նաև Ռոբերտ Փիլոյանի պաշտպան Էդուարդ Աղաջանյանը: Ըստ նրա՝ եթե անգամ պատկերացնենք, որ երիտասարդներն այդ վայրում եղել են, միևնույնն է, խոտի դեզ այրելը ոչ մի դեպքում չի կարող դիտարկվել որպես խուլիգանություն: Նա ևս դատարանից խնդրեց արդարացնել Ռոբերտ Փիլոյանին:

Գործով ամբաստանյալ Գագիկ Առաքելյանի պաշտպան Գայանե Լյուդվիգյանը ևս դատարանից խնդրեց բեկանել առաջին ատյանի դատարանի դատավճիռը և արդարացման դատավճիռ կայացնել:

«Ես անմեղ տեղը կես տարի նստել եմ՝ չիմանալով ինչի համար: Ես հիմա հոգեբանական ծանր իրավիճակում եմ հայտնվել»,- դատարանին ասաց Գագիկ Առաքելյանը:

Նա նշեց, որ աշխատել է որպես Ռոբերտ Փիլոյանի ընտանիքի վարորդ և օգնել նրանց կենցաղային հարցերում: Հաճախ որևէ տեղ գնալիս անգամ չի էլ հարցրել, թե ո՞ւր են գնում, որքա՞ն են այնտեղ մնալու: Դեպքի օրը ևս ինքն իր աշխատանքային պարտականություններն է կատարել և այն հանգամանքը, որ ինքը ևս տղաների հետ մեքենայի մեջ է եղել դեռևս չի վկայում այն մասին, որ ինքը քրեորեն պատժելի արարք է կատարել: Գործով 3 դատավորներին Գագիկ Առաքելյանի հետ կապված հետաքրքրում էր միայն, թե նա գրանցված աշխատող է եղել Փիլոյանների ընտանիքում, թե՝ ոչ: Գագիկ Առաքելյանն ասաց, որ գրանցված չի եղել, բայց յուրաքանչյուր ամիս իրեն աշխատավարձ են տվել:

Դատարանը մեկ ժամ ընդմիջում է հայտարարել: Ընդմիջումից հետո կլսի Արթուր Քլյանի պաշտպանի վերաքննիչ բողոքը:

Հիշեցնենք, որ Քեմբրիջի շրջանավարտ Արամ Մուղալյանը, Ռոբերտ Փիլոյանը, Գագիկ Առաքելյանը մեղադրվում են Արմավիրի մարզի Նորապատ գյուղի բնակիչ Սիաբանդ Խուդոյանին պատկանող խոտի դեզի ոչնչացման փորձ կատարելու և խուլիգանության հոդվածներով, իսկ Արթուր Քլյանը` միայն խուլիգանության: Երիտասարդները չեն ընդունում իրենց առաջադրված մեղադրանքները և Վերաքննիչ քրեական դատարանից պահանջում են արդարացման որոշում հրապարակել:

Արմավիրի մարզի ընդհանուր իրավասության դատարանն Արամ Մուղալյանին և Ռոբերտ Փիլոյանին մեղավոր է ճանաչել առաջադրված մեղադրանքներում, նրանց դատապարտել ազատազրկման 2,6 ամիս ժամկետով, ապա կիրառելով համաներում՝ նրանց ազատ է արձակել դատական նիստի դահլիճից: Գագիկ Առաքելյանին և Արթուր Քլյանին մեղավոր է ճանաչել առաջադրված մեղադրանքներում և նրանց դատապարտել է ազատազրկման 1 տարի 1 ամիս ժամկետով, ապա կիրառելով համաներում՝ երիտասարդներին ազատ է արձակել դատական նիստի դահլիճից: 

 

 Նունե Հովսեփյան

Իրավաբան.net

  Դիտվել է`

Այլ դատական գործեր

Դատական գործերի տեսանյութեր

Դատական գործեր (ֆոտո)

Հետևեք մեզ Facebook-ում

  Պատուհանը կփակվի 6 վայրկյանից...   Փակել