Այս գործի մյուս նիստերը՝
բացել բոլորը
Փակել

Քեմբրիջի շրջանավարտ Արամ Մուղալյանը և նրա 3 ընկերները հայտնվել են դատարանում. դատական գործի մանրամասներ

Քեմբրիջի համալսարանի շրջանավարտ Արամ Մուղալյանն ու իր երեք ընկերները`Ռուսաստանում իրավաբանի մասնագիտություն ստացած, սպորտի չեմպիոն Ռոբերտ Փիլոյանը, Բժշկական ուսումնարանի շրջանավարտ Արթուր Քլյանը, Երևան քաղաքի Ֆիզիկական կուլտուրայի հայկական պետական ինստիտուտի շրջանավարտ, բռնցկամարտիկ Գագիկ Առաքելյանը հայտնվել են ամբաստանյալի աթոռին ուրիշին պատկանող խոտի դեզ այրելու փորձի համար:

Արմավիրի մարզի դատախազությունն Արամ Մուղալյանին, Ռոբերտ Փիլոյանին և Գագիկ Առաքելյանին մեղադրանք է առաջադրել ՀՀ քրեական օրենսգրքի 258 հոդվածի 1-ն մասով` (խուլիգանություն), և 34 ու 185 հոդվածի 2-րդ մասի 1-ին և 2-րդ կետերով (գույքը դիտավորությամբ ոչնչացնելը կամ վնասելը, որը կատարվել է հրկիզման, պայթյունի կամ հանրավտանգ այլ եղանակով, խոշոր չափերի վնաս է պատճառել), իսկ Արթուր Քլյանին` 258 հոդվածի 3-րդ մասի 1-ին կետով` (խուլիգանություն, որը կատարվել է մի խումբ անձանց կամ կազմակերպված խմբի կողմից)։ Արամ Մուղալյանը, Ռոբերտ Փիլոյանը և Գագիկ Առաքելյանը կալանավորված են:

Այսօր Արմավիրի մարզի ընդհանուր իրավասության դատարանի Էջմիածնի նստավայրում նշանակվել էր այդ գործով առաջին դատական նիստը: Տուժող կողմը` ազգությամբ եզդի, Արմավիրի մարզի Նորապատ գյուղի բնակիչ Սիաբանդ Խուդոյանը, դատական նիստին չէր ներկայացել: Չէին ներկայացել նաև գործով վկաները: Նիստերի քարտուղարը հայտնեց, որ նրանք պատշաճ իրազեկված են եղել դատական նիստի մասին: Դատավարական կողմերը տուժողի բացակայությամբ այս փուլում դատական նիստը շարունակելու հարցում որևէ խոչընդոտ չնշեցին:

Դատավոր Վահե Խալաթյանը ճշտեց Արամ Մուղալյանի, Ռոբերտ Փիլոյանի, Գագիկ Առաքելյանի և Արթուր Քլյանի անձնական տվյալները: Պարզվեց` վերջինիս չի տրամադրվել իրեն առաջադրված մեղադրանքի պատճենը: Այդ հիմքով դատարանը որոշեց դատական նիստը հետաձգել:

Նշենք, որ Արթուր Քլյանը, հոգեկան խնդիրների ի հայտ գալու պատճառով, գրավով ազատ է արձակվել: Նրա պաշտպան Արմեն Սողոմոնյանը մի քանի լրագրողների հետ զրուցում հայտնեց, որ իր պաշտպանյալը չի ընդունում իրեն առաջադրված մեղադրանքը: Այն ակնհայտ անհիմն է և իրենք գնալու են դեպի արդարացում: Գործով անցնող մյուս ամբաստանյալների գործողություններում նա ևս հանցակազմ չի տեսնում, իսկ եթե անգամ ինչ-որ բան արել են, ապա իր պաշտպանյալը կարող էր դատարանում հանդես գալ միայն վկայի կարգավիճակով:

Ըստ փաստաբանի` Արմավիրի ոստիկանությունում դեռևս մեկ տարի առաջ ունեցել է չբացահայտված գործեր, որոնցով քրեական գործեր են հարուցվել այս գործով տուժողի և նրա եղբոր հայտարարության հիման վրա, որ իրենց խոտի դեզ վառել և ոչնչացրել են: Ոստիկանությունը մտածել է՝ հավանաբար երիտասարդներին ձերբակալելով, ծանր իրավիճակի մեջ դնելով, կարող է այն գործերը բացահայտել, կապել այդ երիտասարդների հետ, սակայն հետագայում պարզվել է, որ նրանք այդ դեպքի հետ կապ չեն ունեցել:

«Նախաքննական մարմինը, ելնելով իրենց ամբիցիաներից, եթե կա ինչ-որ արարք, ապա որակում են միանգամից ամենածանրը, ամենաբարդը և հետո հենց իրենք են կրակն ընկնում, թե դրա տակից ոնց դուրս գան: Եվ անհիմն դատապարտում են տարբեր մարդկանց: Նույնիսկ ներկայումս, որ Արամ Մուղալյանն ընդունում է, որ ինքը խոտի ինչ-որ մնացորդ է վառել, բայց այդ խոտի մնացորդը չունի որևիցե արժեք, որ դրա համար անձին խուլիգանության կամ գույքը դիտավորությամբ ոչնչացնելու համար դատապարտեն»,- ասաց Արթուր Քլյանի պաշտպան Արմեն Սողոմոնյանը:

Ամբաստանյալ Ռոբերտ Փիլոյանի մայրը` Մարինա Հակոբյանը, Իրավաբան.net-ին հայտնեց, որ իր որդին ևս չի ընդունում իրեն առաջադրված մեղադրանքը, քանի որ որևէ հանցանք չի գործել:

«Մեզ հենց սկզբից քննիչն ու դատախազը պնդում էին, թե Ձեր մեղքն ընդունեք, որ մենք Ձեզ հետ մեղմ վարվենք, բայց եթե մարդը մեղք չի գործել, ի՞նչն ընդունի: Քննիչն իմ տղային ծեծել է, ասել է` ձեռքիս տակ 4 գործ կա, բա ո՞ւմ վրա պետք է բարդեմ»,- ասաց Մարինա Հակոբյանը:

Նա հայտնեց, որ երիտասարդների ձերբակալման ժամանակ ինքը նրանց հետ է եղել և տեսել, թե ինչպես են ոստիկանության աշխատակիցները հարձակվել Արթուր Քլյանի վրա ու ասել՝ գրի, գրի, որ մեղավոր ես, ինքն էլ չի ցանկացել գրել: Դրանից հետո հոգեկան խնդիրներ է առաջացել Արթուր Քլյանի մոտ: Արամ Մուղալյանին ևս ստիպել են բացատրություն տալ, իսկ Ռոբերտ Փիլոյանը, լինելով իրավաբան, ոչինչ չի հայտնել, քանի դեռ իր փաստաբանը չի ժամանել:

«Հունվարի 6-ին, այս տղաները` Քեմբրիջ ավարտած, բուհեր ավարտած, ձյուն- ձմեռ, պետք է գնային դեզ վառեի՞ն: Այստեղ աբսուրդ ինչ-որ բան կա»,- ասաց դատական նիստին ներկա Երևան քաղաքի ավագանու անդամ Անահիտ Բախշյանը:

 

Թեմայի վերաբերյալ առաջարկում ենք կարդալ նաև` «Լույս» հիմնադրամը դատապարտում է Քեմբրիջ ուսանած երիտասարդի ենթադրաբա՛ր կատարած գործողությունները 

 

Նունե Հովսեփյան

Իրավաբան.net

  Դիտվել է`

Այլ դատական գործեր

Դատական գործերի տեսանյութեր

Դատական գործեր (ֆոտո)

Հետևեք մեզ Facebook-ում

  Պատուհանը կփակվի 6 վայրկյանից...   Փակել