Հայաստանում ԵՄ ներկայացուցչության տնտեսական խորհրդական Ալեսանդրո Զանոտան այսօր «Մասնավոր հատվածը կոռուպցիայի դեմ պայքարի արդի մարտահրավերներին դեմ հանդիման» խորագրով աշխատաժողովին նշեց, որ կոռուպցիայի դեմ պայքարում հաջողություն հասնելու համար հարկավոր է երկու ուղղությամբ աշխատել:

Նախ կառավարությունը պետք է գործուն քայլեր ձեռնարկի. «Քաղակական հստակ հանձնարարություն է պետք, առանց այդ հանձնարարության` քաղաքացիական հասարակության, միջազգային գործընկերների ջանքերն ապարդյուն կլինեն,- ասաց պարոն Զանոտան` հավելելով,- ԵՄ-ն քաջալերում է կառավարությանը, որպեսզի այն հնարավորինս շուտ ընդունի հակակոռուպցիոն ռազմավարությունը»:

Այնուհետև պետք է աշխատանքներ տանի քաղաքացիական հասարակությունը` ի դեմս հասարակական կազմակերպությունների. «Քաղհասարակությունն ու բիզնես հանրույթը նույնպես պետք է դիմագրավեն մարտահրավերին ու քաղաքացիների տեսակետը լսելի դարձնեն` քննադատական պահանջներով և հիմնավորումներով, իրենց մտածողությամբ»:

Ըստ Հայաստանում ԵՄ ներկայացուցչության տնտեսական խորհրդականի` քաղհասարակությունը պետք է ակտիվ գործունեություն ծավալի. «Այն չի կարող պարզապես պասիվորեն սպասել, որ օրակարգը կերտի գործադիր իշխանությունը, որը օտարված կլինի հասարակությունից, ուստի ԵՄ-ն աջակցում է ՔՀԿ-ներին»,- ընդգծեց պարոն Զանոտան:

Նշենք, որ աշխատաժողովն իրականացվում է «Հայաստանի օրինավորության ազգային համակարգի գնահատում» ծրագրի շրջանակներում՝ ԹԻՀԿ-ի կողմից և Եվրոպական Միության ֆինանսավորմամբ:

Միջոցառմանը մասնակցում էին նաև ՀՀ արդարադատության նախարարի տեղակալ Սուրեն Քրմոյանը, Թրանսփարենսի Ինթերնեշնլ հակակոռուպցիոն կենտրոն ՀԿ գործադիր տնօրեն Վարուժան Հոկտանյանը, բիզնես ոլորտի ներկայացուցիչներ:

Հիշեցնենք, որ երեկ տեղի ունեցավ Կոռուպցիայի դեմ պայքարի խորհրդի անդրանիկ նիստը: Այս նիստը բոյկոտել էին քաղհասարակության ներկայացուցիչները, նրանք պահանջում են լուծել բազմակողմանի մասնագիտական աշխատանքային խմբի ստեղծման մասին հարցը, որը պետք է երկու հարց քննարկի՝ ինստիտուցիոնալ կառուցակարգերի և ապօրինի հարստացման հետ կապված խնդիրները:

Իրավաբան.net