Հունվարի 21-ին Կենտրոն և Նորք-Մարաշ վարչական շրջանների ընդհանուր իրավասության դատարանում «Ֆինանսական բուրգ» գործով պետք է ցուցմունք տար տուժող Արտակ Գալստյանը: Ինչպես նախորդ դատական նիստին, այնպես էլ այսօր տուժողը չէր ներկայացել, փոխարենը դատարան էր մուտք եղել Արտակ Գալստյանի գտնվելու մասին վկայող գրությունը, որտեղ շեշտվում էր, թե նա Արցախում է:
Դատավոր Գագիկ Պողոսյանը դիմեց տուժողի ներկայացուցիչ, փաստաբան Սուսաննա Սարգսյանին. «Նախորդ դատական նիստին նույնպես ներկա չէր Արտակ Գալստյանը` պատճառաբանությամբ, որ նա եվրոպայում է, ճշտեցինք, որ Եվրոպայում չէ, ապա հայտնվեց Արցախում, Ղարաբաղը եվրոպա չի, ինչո՞ւ չի ներկայանում տուժողը»,- փաստաբանն ասաց, որ երեկ է հեռախոսազրույց ունեցել իր վստահորդի հետ, ով փոխանցել է, որ հունվարի 21-ին, մասնակցելու է իր հարազատի հուղարկավորությանը: Փաստաբանը վստահեցրեց, որ հաջորդ դատական նիստին Ա. Գալստյանը ներկա կգտնվի, ուստի միջնորդեց նիստը հետաձգել: Մեղադրողն ու պաշտպանական կողմը չառարկեցին: Դատարանը բավարարեց տուժող կողմի ներկայացուցչի միջնորդությունը:
Կարդացեք նաև`
Ամբաստանյալի խոսքերով` տուժողն իր «ռեկլամն անում էր» Վանո Սիրադեղյանի անունը շահարկելով
