Այսօր Կոտայքի մարզի Աբովյան քաղաքի դատարանում շարունակվեց Վարդան Պետրոսյանի գործով դատավարությունը, որի ընթացքում հարցաքննվեց դեպքի վայրում զննություն կատարող մասնագետը:
Այսօրվա նիստին հարցաննվեց Կոտաքի մարզային վարչության փորձաքննագիտական խմբի փորձագետ Թորգոմ Եգորյանը: Նա տեղեկացրեց, որ եղել է դեպքի վայրում, մասնակցել է զննությանը, կատարել լուսանկարահանում:
Վարդան Պետրոսյանի պաշտպան Նիկոլայ Բաղդասարյանը կասկածներ ուներ արձանագրության հետ կապված, մասնավորապես Եգորյանի պաշտոնի առումով, փաստացի նա հանդիսանում է փորձագետ, սակայն դեպքի վայրում եղել է որպես մասնագետ` կատարելով միայն լուսանկարահանումներ, մինչդեռ արձանագրության մեջ ստորագրել է փորձագետին առնչվող հատվածում:
Այս հարցերի շրջանակը պարզելու ընթացքում, անընդհատ առարկում էր մեղադրող կողմը, երբ առաջին անգամ դատախազը ցանկանում էր արտահայտել իր առարկությունը, փաստաբանը նշեց, որ վերջինս մտադրված է հուշել վկային, որին ի պատասխան մեղադրող դատախազն ասաց. «Ամեն օր տեսնում եմ փորձագետին, եթե հուշելու բան լիներ, արդեն հուշել էի»: Այսքանով բանավեճը չավարտվեց. «Ցավում եմ, որ մենք ընկել ենք այս անիմաստ թեմայի հետևից: Այս անձը դեպքի վայրում ներկայացել է որպես մասնագետ: Դատավարությունը վեր ենք ածել դիվիդենտներ հավաքելուն: Սա արդեն ապսուրդի է վերածվում»,- ասաց դատախազը, իսկ վկան նշեց. «Քանի որ ձևաթղթի մեջ չկա փորձագետ գրված, ես ստորագրել է այն մասում, որտեղ որ բոլորը, ըտեղ էր համար»:
Ուշագրավ է, որ երբ խոսքը գնաց վկայի` որպես մասնագետի գործունեության մասին, նա պնդեց, որ իրենց գործողությունները չի կարգավորվում ՀՀ օրենսդրությամբ. «Մեր գործունեությունը կարգավորվում է նախկին սովետական միության իրավական ակտով»,- ասաց նա, որին հաջորդեց դատավորի հարցը. «Հայաստանի Հանրապետության որևէ իրավական նորմով առաջնորդվե՞լ եք»,- վկան ասաց, որ դեռ ոչ, օրենքը լրամշակման փուլում է:
Նա նաև տեղեկացրեց, որ դեպքի վայրում լուսանկարել է թվային ֆոտոխցիկով, պաշտպանը ցույց տվեց լուսանկարներ, որոնք արված են գործի հետ չառնչվող տեսախցիկով, ն ասաց, որ կան հետքեր, որոնք ֆիքսված չեն արձանագրության մեջ: Օրինակի համար` ֆիքսված չեն «Նիվա» մակնիշի մեքենայի կողմից թողնված հետքեր, թափված հեղուկի մասին խոսք չկա, ինչը լուսանկարել է վկան, սակայն վերջինս պատասխանեց. «Եթե հետք կա, ուրեմն բոլորին է տեսանելի, նկարել եմ, քննիչը եթե արձանագրության մեջ չկա, ուրեմն քննիչը ավելի մանրամասն զննելով, երևի համոզվել է, որ այդ դեպքը չի վերաբերում գործին»:
Այս ընթացքում շարունակվում էր պաշտպան-մեղադրող-դատավոր բանավեճը: Տուժողի ներկայացուցիչ Ռուբեն Բալոյանը հայտարարության տեսքով կրկնեց նախորդ դատական նիստում իր կողմից ասվածը. «Եթե այսպես շարունակվի մինչև 2015 թիվը չենք ավարտվի», «Հարկ լինի մինչև 2018 թվականը գործի քննություն կիրականացնենք»,- պատասխանեց դատավորը: «Արդեն մեկ ժամ 30 րոպե ջուր ենք ծեծում, խնդրում եմ այս հայտարարությունը արձանագրել»,- դժգոհեց մեղադրող դատախազը:
Այդուհանդերձ, վկայի հարցաքննությունը շարունակեց դատավորը, նա նշեց, որ կողմերից մեկը փաստաթղթեր է ներկայացրել, որոնք հաստատում են` երկրորդ ընթերական չի մասնակցել քննչական գործողություններին և ընդհանրապես այդպիսի մարդ չկա. «Հնարավոր չի, որ չլինի, ես մեկին ճանաչում եմ, մյուսը ճաղատ մարդ էր, անունը չգիտեմ, բայց հաստատ եղել է: Ընթերակային գործի մեջ ներգրավելով նրանից անձնագիր չենք ուզում, միգուցե սուտ տեղեկություն է տրամադրել»:
Այսօրվա դատական քննությունը հետաձգվեց, քանի որ դատավորը այլ դատական նիստ ուներ նշանակված: Այն կշարունակվի հոկտեմբերի 17-ին:
