Վարդան Պետրոսյանի գործով դատավարության ընթացքում, այսօր Աբովյանի դատարանում հայց ներկայացրեց քաղաքացիական հայցվոր, գյուղատնտեսական ծրագրերի պետական հիմնարկի ներկայացուցիչ Հայկազ Կարապետյանը: Վերջինս պնդեց 2 մլն 600 հազար դրամի հայցը՝ պարզաբանելով, որ նշյալ գումարը սեփական նախաձեռնությամբ են ճշտել՝ օգտվելով auto.am կայքից:
Վարդան Պետրոսյանի պաշտպան Նիկոլայ Բաղդասարյանը հետաքրքրվեց, թե արդյոք գումարը մեքենայի շուկայական արժեքն է, Հ.Կարապետյանը դրական պատասխան տվեցի, որին ի պատասխան փաստաբանը տեղեկացրեց, թե հետվթարային վիճակում ավտոմեքենայի մնացորդային արժեքը կազմել է 737 հազար դրամ: Այնուհետև պաշտպանը նշեց, որ մնացորդային արժեքը հարկավոր է հանել շուկայականի գնից և այն պահանջել ԱՊՊԱ-ից:
Տուժողի ներկայացուցիչ Ռուբեն Բալոյանն առարկեց, նշելով, որ քաղհայցվորն ինքն է որոշում ումից պահանջի այդ գումարը. «Այս հարցը պարզաբանման ենթակա չէ, քաղհայցվորը 2 մլն 600 հազար է ուզում, ոչ թե 3 մլն, այսինքն` 400 հազար դրամն էլ զիջում է անում: Դրա մեջ վատ բան չկա»,- շեշտեց :
Այնուհետև Նիկոլայ Բաղդասարյանը դատարանին միջնորդեց անթույլատրելի ճանաչել Վարդան Պետրոսյանի՝ որպես կասկածյալ և որպես մեղադրյալ տված ցուցմունքները: Վարդան Պետրոսյանը միացավ միջնորդությանը` ասելով. «Իմ առաջին, երկու հարցաքննությունը ցանկացել են իրականացնել, առանց իմ պաշտպանի, միշտ ասել եմ՝ խնդրում եմ իմ փաստաբանը կողքիս լինի»: Այս միջնորդության դեմ առարկեց մեղադրող կողմը և տուժողի ներկայացուցիչը: Արդյունքում, դատարանը որոշեց մերժել միջնորդությունը։
Այնուհետև քննարկվեց Վարդան Պետրոսյանի պաշտպան Նիկոլայ Բաղդասարյանի մինչ այս արված միջնորդության քննությունը, փաստաբանը խնդրում էր անհիմն ճանաչել դեպքի օրը տեղի ունեցած փորձաքննության տվյալները` շեշտելով, որ քննիչը չի արձանագրել մի շարք հետքեր: Նա ցուցադրեց քննչական մարմնի լուսանկարներն ու եզրակացությունը, ինչպես նաև դեպքի վայրում գտնվող ֆոտոլրագրող Գագիկ Շամշյանի արված լուսանկարները, որոնցում ակնհայտ հակասություններ կային: Քննիչի պնդմամբ` Niva մակնիշի մեքենայի ետևում հեղուկ է եղել, ինչը չի արձանագրել քննիչը, նա քննչական գործունեության առաջին օրը չի արձանագրել նաև մեքենայի ետևի անիվներից մեկի հետքերը, որը երկրորդ օրը արձանագրվել է կիսատ, չեն արձանահգրվել հետևի և դիմացի ձախ անիվների հետքերը. «Փոխարենը արձանագրվել է մի հետք, որը լուսանկարներում չկա»: Պաշտպանը արձանագրված հետքեր անհիմն համարելու միջնորդության մեջ նշեց, որ արձանագրությունների տակ ստորագրել է ՀՀ Կոտայքի մազրի ոստիկանության ոմն աշխատակից, որի անունը առկա չէ փաստաթղթում. «Այնպես որ պարոն դատավոր ես առաջարկում եմ հետաձգել միջնորդության քննարկումը` նշյալ փորձագետին` Թ. Եգորյանին դատարանում հարցաքննելու միջնորդությունը անելու համար»: Նշյալ միջնորդությունը բավարարվեց, դատարանը բավարարեց նաև դատախազի միջնորդությունը հարցաքննության կանչել դեպքի վայրի զննությանը մասնակից ընթերականին, ՃՈ տեսուչներին և տեղամասային տեսուչին` իրենց միջնորդությունը հիմնավորելով նրանով, որ փաստաթղթերում առկա է երկրորդ ընթերականի ստորագրությունը, սակայն կասկածներ կան նրա ներկայության շուրջ: Դատարանը բավարարեց միջնորդությունը, որին ի հավելում` պաշտպանը միջնորդեց հարցաքննության հրավիրել քննիչ Հայկարամ Նահապետյանին, դատարանը այն մերժեց` անհիմն լինելու պատճառաբանությամբ:
Այսօրվա դատական նիստը ընթանում էր զավեշտալի մթնոլորտում: Զուգահեռ վիճաբանություններ էին ծագում մեղադրող և պաշտպանական կողմի միջև, տեղից նկատառումներ էր անում տուժող կողմի ներկայացուցիչը: Դատավորը մի քանի անգամ ստիպված եղավ կարգի բերել նրանց, օրինակ, երբ խոսքը գնում էր քաղհայցի մասին, պաշտպանը սեփական դիրքորոշումը հայտնելուց հետո` հայտարարություն ցանկացավ անել. «Դե որ ինքը արեց, ես էլ պետք է անեմ»,- տեղից առարկեց տուժող կողմի ներկայացուցիչը. «Մենք էլ բան ու գործ չունենք, գործը քննելու տեղը գանք ձեր հայտարարությունները լսենք»,- զայրացած ասաց դատավորը: Երբ պաշտպանը ներկայացնում էր դեպքի վայրում առկա հետքերը, տուժողի ներկայացուցիչը բորբոքվեց` նշելով, որ փաստաբանի արգումենտները բազմաթիվ անգամ լսել ենք. «Էս տեմպերով, որ շարունակենք 2015 թվականի վերջին գործի դատաքննությունը չի ավարտվի»: Նիստին լարված էին նաև տուժողներ Արթուր և Էմմա Հակոբյանները:
Հիշեցնենք` Վարդան Պետրոսյանին մեղադրանք է առաջադրվել այն բանի համար, որ նա 2013թ. հոկտեմբերի 20-ին, ժամը 22:10–ի սահմաններում իր անձնական օգտագործման «ԲՄՎ-320» մակնիշի, 04 ՍԼ 920 պ/հ ավտոմեքենան վարել է Կոտայքի մարզի Սարալանջ գյուղի կողմից դեպի Երևան քաղաքի ուղղությամբ։ Հասնելով Եղվարդ-Երևան ավտոճանապարհի 2-րդ կմ հատվածին իրականացրել է ոչ պատշաճ և վտանգավոր երթևեկություն` ավտոմեքենան վարել է բնակավայրում սահմանված թույլատրելի առավելագույնը գերազանցող առնվազն ` 71 կմ/ժ արագությամբ և երթևեկության ընթացքում միաժամանակ օգտվելով հեռախոսակապից, ինքն իրեն զրկել է ավտոմեքենայի լիարժեք կառավարումն իրականացնելու տեխնիկական հնարավորությունից, թույլ է տվել ՃԵԿ-ի 65 և 66 կետերի, ինչպես նաև «ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ կետի, 24 հոդվածի 7-րդ կետի «Զ» ենթակետի պահանջներին հակասող գործողություններ, ստեղծել է վթարային իրադրութուն, որի արդյունքում ավտոմեքենան դուրս է բերել երթևեկելի մասից դեպի աջ և առջևի մասով ընդհարվել է հողածածկ կողնակում կանգնած վիճակում գտնվող «Վազ 21214» մակնիշի, 870 ՕԼ 64 պ/հ ավտոմեքենայի հետևի մասին, որի հետևանքով «Վազ -21214» մակնիշի ավտոմեքենայի ուղևորներ էդվարդ Արթուրի Հակոբյանին և էդգար Հայկի Հակոբյանին անզգուշությամբ պատճառել է մահ, Տաթևիկ Արթուրի Հակոբյանի առողջությանը, ծանր վնաս` որպես կյանքին վտագ սպառնացող, Հայկ Մարտիրոսի Հակոբյանի, էմմա Հայկի Հակոբյանի ինչպես նաև ավտովարորդ Արթուր Մարտիրոսի Հակոբյանի առողջությանը, միջին ծանրության վնաս` առողջության տևական քայքայումով:
