Ինչպես արդեն տեղեկացրել էինք, այսօր Վերաքննիչ քրեական դատարանում ընթանում էր ժամկետային զինծառայող Լյուքս Ստեփանյանի սպանության մեջ մեղադրվող Դավիթ Խաչատրյանի փաստաբան Երեմ Սարգսյանի բերված բողոքը:
Նիստին դատարանին ինքնաբացարկի միջնորդությամբ հանդես եկավ Երեմ Սարգսյանը, իր միջնորդության մեջ նա շեշտեց, որ դատարանը կանխակալ վերաբերմունք է ցուցաբերում. «Դատարանը հնարավորինս արագ է փորձում դատը ավարտել: Երբ տուժողը խոսում էր անկապ կրակոցից, դատարանը չհետաքրքրվեց՝ ինչպես է դա եղել: Դատարանը պետք է անկողմակալ լինի»,- այնուհետև փաստաբանը մեջբերեց դատական գործի այլ մանրամասներ՝ եզրահանգելով, որ դատարանը շարունակում է պահպանել պետական մարմինների դիրքորոշումը. «Այս հանգամանքները հաշվի առնելով՝ դատարանն ակնհայտ կանխակալ վերաբերմունք է ցուցաբերում, ի զորու չէ իրականացնել արդարադատություն: Հայտնում եմ ինքնաբացարկ»,- եզրափակեց պարոն Սարգսյանը:
Մեղադրող կողմը առարկեց միջնորդության վերաբերյալ՝ շեշտելով, որ այսկերպ պաշտպանական կողմը փորձում է ճնշում գործադրել դատարանի վրա. «Ես չեմ կարծում, որ դատարանը կանխակալ վերաբերմունք է ցուցաբերում, անհիմն է պաշտպանի միջնորդությունը: Ես սա համարում եմ ազդեցություն դատարանի վրա»:
Տուժողի ներկայացուցիչը նույնպես գտավ, որ միջնորդությունը անհիմն է:
Դատարանը հեռացավ խորհրդակցության, վերադառնալով որոշեց մերժել Դավիթ Խաչատրյանի պաշտպան Երեմ Սարգսյանի միջնորդությունը: Դատարանը հեռտացավ խորհրդակցության սենյակ դատական ակտ կայացնելու համար:
