Այս գործի մյուս նիստերը՝
բացել բոլորը
Փակել

Ինչո՞ւ Վարդան Պետրոսյանը նախաքննության ընթացքում ցուցմունք չի տվել. դերասանը դատարանում խոսեց

Կոտայքի մարզի ընդհանուր իրավասության առաջին ատյանի դատարանում այսօր շարունակվեց դերասան Վարդան Պետրոսյանի գործի քննությունը: Տուժողներն ու տուժողների իրավահաջորդները չէին ներկայացել դատական նիստին և խնդրել էին իրենց բացակայությամբ անցկացնել նիստը: Դատավոր Վաղինակ Մկրտչյանը հայտնեց, որ դատարան է ստացվել Ոստիկանության Կոտայքի բաժնից որոշում, որով մերժվել է Վարդան Պետրոսյանի պաշտպան Նիկոլայ Բաղդասարյանի` իր կյանքին վտանգ սպառնալու և դատարանի նկատմամբ անհարգալից վերաբերմունք դրսևորելու համար քրեական գործ հարուցելու մասին դիմումը:

Նիկոլայ Բաղդասարյանը հայտարարեց, որ իր դիմումի շրջանակներում, երբ իրեն հրավիրել են բացատրություն տալու, ծանուցագիրը ուշ է ստացել և չի կարողացել ներկայանալ ոստիկանություն, սակայն փոխանցել է հեռախոսով, որ նման տիպի գործերը հանրային մեղադրանքի գործեր են և բնավ պարտադիր չէ, որ իր բողոքը լինի դեպքի առթիվ քրեական գործ հարուցելու համար:

Նիկոլայ Բաղդասարյանը դատարանին ապացույց ներկայացրեց հիմնավորելու նախորդ դատական նիստի ժամանակ դատարանում ցուցմունք տված, Վարդան Պետրոսյանի խմածությունը ստուգած բժշկի հայտնածի հակառակը: Ըստ բժիշկ Համազասպ Գևորգյանի` հնարավոր էր ալկոմետրը, որով չափել են Վարդան Պետրոսյանի ալկոհոլ օգտագործած լինել, չլինելը, խմածություն ցույց չտար, եթե դրա մեջ մղված օդը բավարար չափով չմղվեր: Նաիրի բժշկական կենտրոն ուղղված հարցմանն ի պատասխան, պարզվել է, որ սարքի մեջ բավարար չափով օդ չմղվելու դեպքում, ալկոմետրն անգամ 0 արդյունք ցույց չէր տա: Նման տեղեկատվություն էր ստացել նաև սարքի մասին ինտերնետից թարգմանած նյութից:

Դատախազ Արթուր Սարգսյանը գնահատեց «տքնաջան աշխատանքը», սակայն նշեց, որ այդ տվյալներն ապացուցողական նշանակություն չունեն: Տուժողների և տուժողների իրավահաջորդների ներկայացուցիչ Ռուբեն Բալոյանը նշեց, որ այդ տվյալների ներկայացումը նպատակ է հետապնդում լրացնել բժշկի բաց թողած, հակասական ցուցմունքը դատարանում: Դատավորը որոշեց ապացույցները կցել քրեական գործին:
Հաջորդ միջնորդությամբ Նիկոլայ Բաղդասարյանը միջնորդեց հնարավորություն տալ Վարդան Պետրոսյանին ցուցմունք տալու հենց այս դատական նիստի ժամանակ: Կողմերը չառարկեցին, Ռուբեն Բալոյանի մեկ միջնորդության մերժումից հետո սկսվեց ամբաստանյալ Վարդան Պետրոսյանի հարցաքննությունը:

Նա նախ նշեց, թե ինչու նախաքննության փուլում ցուցմունք չի տվել` բացատրելով, որ սկզբում քննիչը փորձել է մի քանի անգամ իրենից ցուցմունք կորզել առանց իր փաստաբանի բացակայությունը հաշվի առնելու, ապա իրեն կալանավորելուց հետո գործում կարևոր մի շարք փաստաթղթի պատճեններ նախաքննության մարմինը հրաժարվել է տալ իր պաշտպանին, և ինքը` որպես բողոքի նշան, որոշել է ցուցմունք չտալ: Ավելի ուշ նրա ցուցմունքը չտալը կապված է այն հանգամանքի հետ, որ ինքն ամեն գնով ցանկացել է հաշտության հասնել տուժող կողմի հետ և քանի որ տուժողներն ամբողջությամբ այլ բան են պատմել վթարից, քան ինքը կպատմեր, նախընտրել է այդ փուլում լռել:

«Շատ էր քննարկվում իմ ցուցմունք տալու, չտալու հարցը, շատերն ասում էին տղամարդկություն էլ չունի ցուցմունք տալու համար, բայց ես կասեմ` այդ պարագայում տղամարդկություն էր ցուցմունք չտալը, լռելը»,- նշեց Վարդան Պետրոսյանը:

Նա դեպքի օրվա մասին պատմեց, որ «Չէին սպասում» հաղորդման նկարահանող խումբը գնացել է Սարալանջ գյուղում գտնվող իր տուն, նկարահանել են, ապա որոշել են միանգամից նկարահանել նաև «Քաղցած չէին սպասում» հաղորդումը: Այդ ժամանակ դերասանը զանգահարել է իրեն հյուր գնալու պատրաստված իր քրոջն ու մյուս երկու ազգականներին, որպեսզի ճանապարհից որոշ գնումներ կատարեն: Ամբաստանյալի խոսքով` այդքան շատ քննարկված հարցը` իրենք նկարահանման օրը օղի խմել են, թե ոչ, հնարավոր է հեշտությամբ պարզել հեռուստաէկրանից դուրս մնացած կադրերը նայելով, որտեղ հստակ երևում է, թե ինչպես են ջուր լցրել շշի մեջ և մի կադրում էլ Վարդան Պետրոսյանը օղի բառի փոխարեն ջուր է ասել, ապա նորից են կրկնել կադրը: Նա նշեց, որ ինքը դեպքի հաջորդ օրը ներկայացում է ունեցել և սովորություն չունի ներկայացումից օրեր առաջ, ընթացքում կամ հետո ալկոհոլ օգտագործելու:

Կոնկրետ ավտովթարի մասին հայտնեց, որ ինքը մեքենան վարել է աջ կողմով, կողնակին մոտ, նկատել է իր մեքենայից մի փոքր աջ գտնվող, հետընթաց լույսերը վառ մի մեքենա, որը կտրուկ ձախ է թեքվել և ինքը մի քանի անգամ իր մեքենայի հեռակա լույսերը մոտակայի է փոխել և հակառակը, ապա արգելակել է, փորձել մանևրել, սակայն մեքենաների բախում է տեղի ունեցել ճանապարհի բանուկ մասում:

Ցուցմունքի վերջում դերասանը դատարանի ուշադրությունը հրավիրեց այն փաստերի վրա, երբ Հայաստանում մարդիկ փողոցում իրար են կրակում, «մի դեպուտատի» երաշխավորությամբ չեն կալանավորվում, իսկ իր պարագայում տասնյակ հազարների հասնող անձանց, այդ թվում` հայտնի աստղերի երաշխավորությունը խափանման միջոցը փոփոխելիս հաշվի չառան:

Վարդան Պետրոսյանը ցուցմունքն ավարտելուց հետո պատասխանեց Նիկոլայ Բաղդասարյանի մի շարք հարցերին, ապա դատախազ Արթուր Սարգսյանի և դատավոր Վաղինակ Մկրտչյանի հարցերին, սակայն, ինչպես ավելի վաղ էր հայտարարել, հրաժարվեց պատասխանել Ռուբեն Բալոյանի և Զարուհի Վարդանյանի հարցերին: Հակառակ դրան` տուժող կողմի փաստաբանները իրենց հարցերը հնչեցրեցին` առանց պատասխան ակնկալելու: Դրանցից 4-ը հանվեց` ոչ վերաբերելի լինելու համար:

Դատական նիստն ընդմիջվեց Եղվարդի ոստիկանության հատուկ պահպանման տարածքում քարեկան գործով ապացույցները հետազոտելու համար:

Նունե Հովսեփյան
Իրավաբան.net

Այս գործի մյուս նիստերը՝

Այլ դատական գործեր

Կարևոր լուրեր

Հետևեք մեզ Facebook-ում

  Պատուհանը կփակվի 6 վայրկյանից...   Փակել