Օգոստոսի 18-ին, ժամը 06.35-ին, հիվանդանոցից ոստիկանության Քանաքեռ-Զեյթունի բաժնում հաղորդում է ստացվել, որ «կրծքավանդակի վերին աջ կեսի հետին պատի և որովայնի առաջնային ծակած կտրած վերքեր» ախտորոշմամբ բուժօգնության է տեղափոխվել 1995 թ. ծնված Էդուարդ Օ.-ն, որը, ըստ բժշկի տեղեկանքի, ի վիճակի չի եղել հաղորդում տալու:
Ոստիկանության Արաբկիրի և Քանաքեռ-Զեյթունի բաժինների ծառայողների ձեռնարկած միջոցառումների շնորհիվ պարզվել է, որ նույն օրը, ժամը 02.30-ին, Երևանի Կոմիտասի պողոտայի թիվ 19 շենքի դիմաց նրան դանակով հարվածել է 1992 թ. ծնված Խաչիկ Դ.-ն, որը նույն օրը, ժամը 11.30-ին, բերման է ենթարկվել ոստիկանության Արաբկիրի բաժին և խոստովանել հանցանքը:
Ոստիկանության լրատվության բաժնի փոխանցմամբ` Խաչիկ Դ.-ն ձերբակալված է: Կատարվում է նախաքննություն:
