ՄԻԵԴ-ում նոր դատավոր ընտրելու համար հանձնաժողով կստեղծվի. կազմն արդեն հաստատվել է

Նախագահ Սերժ Սարգսյանի հրամանագրով կստեղծվի Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողով:

Հրամանագրում մասնավորապես ասվում է.

«Նպատակ ունենալով ապահովել Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների արդար ընտրությունը, հաշվի առնելով Եվրոպայի խորհրդի խորհրդարանական վեհաժողովի 2009 թվականի հունվարի 27-ի «Մարդու իրավունքների եվրոպական դատարանի դատավորի թեկնածուների առաջադրման և դատավորների ընտրության մասին» թիվ 1646(2009) բանաձևի և Եվրոպայի խորհրդի նախարարների կոմիտեի 2012 թվականի մարտի 28-ի «Մարդու իրավունքների եվրոպական դատարանի դատավորի պաշտոնի համար թեկնածուների ընտրության մասին» թիվ CM(2012)40 ուղեցույցի դրույթները, հիմք ընդունելով 1950 թվականի նոյեմբերի 4-ի «Մարդու իրավունքների և հիմնարար ազատությունների պաշտպանության մասին» կոնվենցիայի 22-րդ հոդվածը, ղեկավարվելով Հայաստանի Հանրապետության Սահմանադրության 55-րդ հոդվածի 7-րդ կետով և 56-րդ հոդվածով՝ ո ր ո շ ու մ ե մ.

1. Ստեղծել Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողով՝ հետևյալ կազմով.

Հայաստանի Հանրապետության սահմանադրական դատարանի նախագահ (համաձայնությամբ)

Հայաստանի Հանրապետության վճռաբեկ դատարանի նախագահ (համաձայնությամբ)

Մարդու իրավունքների եվրոպական դատարանում Հայաստանի Հանրապետության դատավոր (համաձայնությամբ)

Մարդու իրավունքների պաշտպան (համաձայնությամբ)

Հայաստանի Հանրապետության արդարադատության նախարար

Մարդու իրավունքների եվրոպական դատարանում Հայաստանի Հանրապետության կառավարության լիազոր ներկայացուցիչ

Հայաստանի Հանրապետության փաստաբանների պալատի նախագահ (համաձայնությամբ)

Արդարադատության ակադեմիայի ռեկտոր (համաձայնությամբ)

«Հայաստանի Հանրապետության դատավորների միություն» հասարակական կազմակերպության նախագահ (համաձայնությամբ):
Հաստատել Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովի գործունեության և թեկնածուների ընտրության կարգը՝ համաձայն հավելվածի»:

Իրավաբան.net

 

Հետևեք մեզ Facebook-ում

  Պատուհանը կփակվի 6 վայրկյանից...   Փակել