Նորություններ

Էթիկա. Ինչպե՞ս կատարել փողկապի ճիշտ ընտրություն

Ժամանակակից տղամարդու համար փողկապն իր հանդերձի կարևորագույն մասն է կազմում: Սակայն մերօրերում քիչ չեն այն տղամարդիկ, ովքեր չեն սիրում փողկապ կրել առհասարակ, անգամ հանդիսությունների ժամանակ: Սակայն չմոռանանք, որ որոշ աշխատավայրերում այն հանդերձի պարտադիր մաս է կազմում:

Սովորաբար տղամարդիկ իրենց հանդերձապահարաններում պետք է ունենան մի քանի տեսակի փողկապներ: Փողկապների նախշերի և գույնի ընտրությունը կատարվում է այն համապատասխանեցնելով հագուստին, միջոցառմանը (հանդիսությանը):

Փողկապների մասին առաջին հիշատակմանը կարելի է հանդիպել Հին Եգիպտոսի պատմության մեջ, ուր մարդիկ կանոնավոր երկրաչափական մի կտոր փաթաթում էին ուսերին՝ որպես իրենց սոցիալական կարգավիճակի յուրահատուկ խորհրդանիշ: Բացի այդ, առաջին փողկապներ կրել են նաև Հին Չինաստանում: Այդ մասին են վկայում կայսեր Շիհուան Դիի շիրմաքարի մոտ տեղակայված քարե արձանները, ուր ազնվականների և զինվորների պարանոցներին հստակ երևում են կապեր, որոնք ակամա հիշեցնում են փողկապներ: Սակայն այս նշված կապերն իրենց ձևով և չափերով հեռու են ժամանակակից փողկապներից:

Ժամանակակից փողկապների ստեղծման ժամանակաշրջանը սկսվում է Հին Հռոմից. այստեղ հռոմեացի լեգիոներները պարանոցներին թաշկինակ էին կապում: Իսկ արդեն 1635 թվականից սկսած փողկապները տղամարդկանց հանդերձի անբաժանելի և գլխավոր մասն են կազմել:

Իսկ ինչպե՞ս կատարել փողկապի ճիշտ ընտրություն:

Ամենօրյա համար սովորաբար ընտրվում են մուգ երանգների փողկապներ՝ կրկնվող մեծ նախշերով կամ ոչ այնքան աչքի ընկնող մեկ մեծ նախշով: Մուգ փողկապները կրում են բաց գույնի վերնաշապիկների հետ:

Միագույն կոստյումի հետ սովորաբար կրում են վառ նախշերով փողկապ, իսկ վանդակավոր կամ գծավոր կոստյումի հետ ավելի հարգի են միագույն փողկապները:

Վառ գույնի և նախշերով վերնաշապիկի հետ պետք է համադրել միագույն փողկապ: Փողկապը միշտ պետք է մուգ լինի վերնաշապիկից:

Երեկոյան մուգ կոստյումին ավելի հարմար է մետաքսյա փողկապը:

Սինթետիկ փողկապը կրում են միայն կաշվե բաճկոնի հետ:

Փողկապ-թիթեռնիկ պետք է կրել միայն տոնական հանդիսությունների ժամանակ:
Մարզական և բրդյա վերնաշապիկների հետ փողկապ չեն կրում:

Փողկապ ընտրելիս պետք է հաշվի առնել այն կրողի ուսերի լայնությունը. եթե մարդու ուսերը լայն են, փողկապը ևս պետք է լայն լինի և հակառակը:

Փողկապը երբեք չպետք է գոտկատեղից ներքև իջնի:

Խորհուրդ չի տրվում փողկապը լվանալ և արդուկել:

Ժամանակակից կանայք նախընտրում են ժամանակակից տղամարդկանց, և չպետք է մոռանալ, որ հասարակության մեջ տղամարդու զբաղեցրած դիրքի, աշխատանքի, անգամ ճաշակի մասին առավել հաճախ խոսում է հենց նրա արտաքինը և բնական է, ճիշտ ընտրված հագուստը: Ուստի գեղեցիկ, խնամված, և ինչու չէ, կնոջը հաճոյանալու համար կարելի է չզլանալ և առավել հաճախ փողկապ կրել:

Հանրային թղթակից՝ Սոնա Հարությունյան

Աղբյուրը՝ Իրավաբան.net

  Դիտվել է`

Իրավաբան TV

Հետևեք մեզ Facebook-ում

  Պատուհանը կփակվի 6 վայրկյանից...   Փակել