Ոստիկանության Սևանի բաժնում քաղաքացուն ենթադրյալ խոշտանգում կատարելու կասկածանքով ձերբակալված երեք ոստիկանները՝ Գեղարքունիքի մարզային վարչության Սևանի բաժնի քրեական հետախուզության բաժանմունքի պետն ու նույն բաժանմունքի երկու օպերլիազորներն ազատ են արձակվել:
Այս մասին տեղեկությունը Իրավաբան․net-ի հետ զրույցում հայտնեց Հատուկ քննչական ծառայության մամուլի քարտուղար Մարինա Օհանջանյանը:
«Նրանցից մեկի նկատմամբ խափանման միջոց է ընտրվել ստորագրություն չհեռանալու մասին, ոստիկանության երկու ծառայողների նկատմամբ ՀՔԾ -ն կալանքի միջնորդություն է ներկայացրել։ Դատարանը նրանց գրավի դիմաց ազատ է արձակել»,-նշեց Մարինա Օհանջանյանը:
Հիշեցնենք, որ հոկտեմբերի 19-ին ոստիկանության 3 ծառայող ձերբակալվել էին ՀՀ հատուկ քննչական ծառայությունում հարուցված քրեական գործի շրջանակներում ՀՀ քրեական օրենսգրքի 309.1-րդ հոդվածի 2-րդ մասի 4-րդ կետով նախատեսված հանցավոր արարք կատարելու կասկածանքով։ Վերջիններս կասկածվում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու համար:
Նրանց ազատ արձակելու պահանջով Սևանի բնակիչները հոկտեմբերի 20-ին փակել էին Երևան-Սևան ճանապարհը: Ավելի ուշ ոստիկանների հարազատներին էր ընդունել նաև ՀՀ ոստիկանապետ Վալերիյ Օսիպյանը։
