Երևանի ընդհանուր իրավասության դատարանի Շենգավիթի նստավայրում այսօր՝ հունիսի 28–ին, տեղի ունեցավ Իշխան Բարսեղյանի կողմից ենթադրյալ կաշառք վերցնելու գործով հերթական դատական նիստը՝ դատավոր Վաչե Մարգարյանի նախագահությամբ։
Այժմ դատավարությունը վիճաբանությունների փուլում է: Պաշտպանական ճառով հանդես եկավ Իշխան Բարսեղյանի պաշտպաններից Կարեն Ղազարյանը:
Նա ներկայացրեց մինչ օրս դատարանի մերժած միջնորդությունները՝ այդ թվում նաև վկաներին լրացուցիչ հարցաքննելու և փաստաթղթերում առկա Ի․Բարսեղյանի ստորագրության փորձաքննության վերաբերյալ միջնորդությունը: Նշենք, որ Ի․Բարսեղյանը նշել է, որ ստորագրությունը կարող է իրենը չլինել ։
«Մեր կողմից արված ցանկացած միջնորդություն դատարանը մերժել է, անկախ ներկայացված հիմնավորումներից»,- ասաց պաշտպանը։
Պաշտպանը նշեց այն դատավարական և Ի․Բարսեղյանի իրավունքների մասին խախտումները․ անմեղության կանխավարկած, դատարանների մատչելիություն և հավասարություն, որոնք տեղի են ունեցել գործի քննության ընթացքում՝ հիմնավորելով կոնկրետ օրինակներով։
Անդրադառնալով Ի․Բարսեղյանի մեղավորությունն ապացուցող տեսանյութերին Կ․Ղազարյանը պահանջ ներկայացրեց ապացույցները փորձաքննության ենթարկելու և տեսագրությունների ամբողջական տարբերակները դատարանում զննելու, քանի որ, ըստ պաշտպանական կողմի, դրանք մոնտաժված են:
Ամբաստանյալ Իշխան Բարսեղյանը դատարանից ընդմիջում խնդրեց վատ ինքնազգացողության պատճառով։
Հինգ րոպե ընդմիջումից հետո Կ․Ղազարյանը ներկայացրեց վկա Նորիկ Հակոբյանի տված ցուցմունքը, որը, ըստ պաշտպանի, չի համապատասխանում իրականությանը։ Ինչպես նաև հրապարակեց վկա Ն․Հակոբյանի և Ի․Բարսեղյանի առերեսումը, որի ընթացում, ըստ պաշտոնական կողմի, Ն․Հակոբյանը անգիր արված բառեր է ասել։
Դեպքի առթիվ Ն․Հակոբյանի գործողությունները ըստ ժամանակացույցի, պաշտպանական կողմի ճառում պետք է ներկայացնեին պաշտպաններ Կարեն Հովհաննիսյանը և Վարդուհի Էլբակյանը, բայց Վ․Էլբակյանը բացակայում էր դատական նիստից՝ մեկ այլ նախապես նշանակված դատական նիստի պատճառով։ Կ․Հովհաննիսյանը միջնորդություն հայտնեց դատական նիստը հետաձգել՝ պաշտպանական ճառը առարկայական, ժամային տախտակով ներկայացնելու և Վ․Էլբակյանի ներկայութան համար։
Դատարանը ընդունեց միջնորդությունը և դատական հաջորդ նիստը նշանակվեց 2 շաբաթ հետո՝ հուլիսի 12-ին ժամը 14։00։
Հիշեցնենք, որ Իշխան Բարսեղյանը բերման էր ենթարկվել «Հայրենիք» կինոթատրոնի շրջակայքում Ազգային անվտանգության ծառայության աշխատակիցների կողմից՝ 1000 ԱՄՆ դոլար կաշառք վերցնելու կասկածանքով։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով:
Մերի Մնոյան
