Ավելի վաղ տեղեկացրել էինք, որ 2018թ. մայիսի 25-ին ՀՀ քննչական կոմիտեում  ստացվել  է Հայաստանի երիտասարդական հիմնադրամի հոգաբարձուների խորհրդի անդամ， ԱԺ պատգամավոր Կարեն Ավագյանի դիմումն առ այն,  որ ապրիլի 6-ին Հայաստանի Երիտասարդական հիմնադրամի գործադիր տնօրենը հիշյալ հիմնադրամի անունից ինքն իր հետ կնքել է 326.000.000 ՀՀ դրամի փոխառության պայմանագիր:

Դիմումի հիման վրա հարուցվել է քրեական գործ՝ առանձնապես խոշոր չափերով յուրացում կատարելու դեպքի առթիվ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով։

Այս մասին Իրավաբան.net-ը զրուցել է Կարեն Ավագյանի հետ:

«Ցավալի դեպք է եղել, իմ ահազանգի հիման վրա է բացահայտվել: Բոլոր գնահատականները պետք է թողնենք իրավապահ մարմիններին և չենթարկվենք որևէ քաղաքական շահարկումների գայթակղությանը»,-նշեց նա:

Իրավաբան.net-ի լրագրողի հարցին, թե ինչպես է չարաշահումների մասին իմացել պատգամավորը, Կարեն Ավագյանը պատասխանեց. «Իրավապահ մարմինների գնահատականից հետո ես ավելի ազատ կլինեմ խոսել»:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Եվգենյա Համբարձումյան