Կառավարության հերթական նիստի ժամանակ գործադիրը տարկետում կտրամադի Աղվան Գագիկի Արզումանյանին։
Նշենք, որ Արզումանյանը ծնվել է 1988 թվականի նոյեմբերի 6-ին, 2006 թվականին ընդունվել է ՌԴ ազգերի բարեկամության համալսարան, որտեղ ուսանելու համար ՀՀ կառավարության 22.03.2007 թվականի N 320 որոշմամբ պարտադիր զինվորական ծառայության զորակոչից ստացել է տարկետում մինչև ուսումնառության ավարտը` 2011 թվականի աշնանային զորակոչ:
Նույն բուհի կլինիկական ինտերնատուրայում /պետպատվեր/` մանկահասակների ստոմատոլոգիա մասնագիտությամբ ուսումնառությունը շարունակելու համար ՀՀ կառավարության 2011 թվականի դեկտեմբերի 29-ի N 1875-Ա որոշմամբ Ա. Արզումանյանին տրվել է տարկետում մինչև 2012 թվականի աշնանային զորակոչ:
Իսկ կլինիկական օրդինատուրայում /մանկական ատամնաբուժություն /օրթոդոնտ/ մասնագիտությամբ/ ուսումնառություն ստանալու համար նրան տրվել է տարկետում ՀՀ կառավարության 2013 թվականի հունվարի 16-ի N 30-Ա որոշմամբ:
Ներկայումս նա ուսուցումը շարունակում է նույն բուհի ասպիրանտուրայում, որտեղ ուսանելու համար տարկետում տրամադրելու դիմումը նա ՀՀ կրթության և գիտության նախարարություն է ներկայացրել 2014 թվականի հուլիսի 29-ին: Բուհի կողմից տրամադրված տեղեկանքի համաձայն ուսումնառության ժամկետը սահմանված էր մինչև 2017 թվականի ձմեռային զորակոչ:
Նույն թվականի սեպտեմբեր ամսից սահմանված կարգով սկսվել է տարկետման գործընթացը, որը տևել է մինչև 2015 թվականի հունիս ամիսը: Նշված ժամանակահատվածում Ա. Արզումանյանը գտնվում էր Հայաստանի Հանրապետությունում և չէր կարող մասնակցել դասընթացներին, որի հետևանքով համալսարանից հեռացվելու խնդիր էր առաջացել:
Հաշվի առնելով ստեղծված իրավիճակը Ա. Արզումանյանը բուհում 1 տարով ձևակերպել է ակադեմիական արձակուրդ՝ մինչև ՀՀ կառավարության կողմից պարտադիր զինվորական ծառայության զորակոչից տարկետում տալու որոշման ընդունումը: ՀՀ կառավարության 2015 թվականի հուլիսի 16-ի N 767-Ա որոշմամբ նրան տրվեց տարկետում՝ մինչև 2017 թվականի ձմեռային զորակոչ, որն արդեն իսկ վերոնշյալ հանգամանքներից ելնելով ժամանակավրեպ էր:
Ներկայումս ՀՀ կրթության և գիտության նախարարություն է դիմել Ա. Արզումանյանը «Զինապարտության մասին» Հայաստանի Հանրապետության օրենքի 16-րդ հոդվածի 2-րդ մասին համապատասխան իրեն պարտադիր զինվորական ծառայության զորակոչից տրված տարկետումը երկարաձգելու խնդրանքով՝ մինչև 2018 թվականի զորակոչ:
Որոշման նախագծի ընդունման անհրաժեշտությունը պայմանավորված է նրանով, որ Ա. Արզումանյանին հնարավորություն կընձեռվի ավարտել լավագույն բուհերից մեկը և ստացած գիտելիքները ներդնել Հայաստանի Հանրապետությունում ոլորտի զարգացման համար:
