Ակցիզային հարկը հարկման օբյեկտ համարվող գործարքների և/կամ գործառնությունների իրականացման համար Օրենսգրքով սահմանված կարգով, չափով և ժամկետներում պետական բյուջե վճարվող պետական հարկ է: Սա ամրագրված է Հարկային օրենսգրքի 82-րդ հոդվածով:
Նշենք, որ ակցիզային հարկով հարկման օբյեկտ են համարվում ակցիզային հարկով հարկման ենթակա ապրանքների մասով իրականացվող հետևյալ գործարքները և/կամ գործառնությունները.
- արտադրողի կողմից արտադրված կամ տարայավորված՝ ակցիզային հարկով հարկման ենթակա ապրանքի մատակարարումը, եթե ապրանքի մատակարարման վայրը համարվում է ՀՀ-ն:
- «Բաց թողնում՝ ներքին սպառման համար» մաքսային ընթացակարգով ակցիզային հարկով հարկման ենթակա ապրանքի ներմուծումը ՀՀ,
- ԵՏՄ անդամ պետություններից ակցիզային հարկով հարկման ենթակա՝ ԵՏՄ ապրանքի կարգավիճակ ունեցող ապրանքի ներմուծումը ՀՀ,
- ավտոգազալիցքավորման ճնշակայանում սեղմված բնական գազի մատակարարումը (ավտոգազալիցքավորման ճնշակայանում սեղմված բնական գազի մատակարարում է համարվում նաև ավտոգազալիցքավորման ճնշակայան շահագործող հարկ վճարողի կողմից ներտնտեսական կարիքների համար սեղմված բնական գազի սպառումը):
Ակցիզային հարկով հարկման ենթակա ապրանքներն են՝
- էթիլային սպիրտը (բացառությամբ կոնյակի սպիրտի).
- սպիրտային խմիչքները.
- գարեջուրը.
- գինին.
- ծխախոտի արտադրանքը (այդ թվում՝ ծխախոտի արդյունաբերական փոխարինիչները, սիգարները, սիգարելաները).
- քսայուղը.
- բենզինը.
- դիզելային վառելիքը.
- հում նավթը.
- նավթամթերքները.
- նավթային գազերը.
- գազանման այլ ածխաջրածինները (բացառությամբ սեղմված չհամարվող բնական գազի).
- սեղմված բնական գազը: (Սեղմված բնական գազ է համարվում ԱՏԳ ԱԱ 2711 21 ապրանքային դիրքին դասվող բնական գազը, որը ստացվում է մի քանի փուլով (խառնուրդի մաքրում, խոնավության և այլ աղտոտիչների հեռացում ու սեղմում) գազի մշակման արդյունքում՝ առանց բնական գազի բաղադրության փոփոխության):
