Կատարելագործվում են հայ փրկարարների լեզվական գիտելիքները

Նոյեմբերի 23-ին ՀՀ արտակարգ իրավիճակների նախարարության Ճգնաժամային կառավարման պետական ակադեմիայում մեկնարկեց հայ փրկարարների՝ ռուսերենի իմացության մակարդակի բարձրացմանն ուղղված առաջին դասընթացը: Այն նպատակ ունի կատարելագործել փրկարարների լեզվական գիտելիքները, ինչը հնարավորություն կտա նրանց հետագայում վերապատրաստվել ՌԴ տարբեր կրթական հաստատություններում:

Դասընթացն անցկացվում է Հայ-ռուսական մարդասիրական արձագանքման կենտրոնի համագործակցության շրջանակներում՝ Երևանում գիտության և մշակույթի ռուսական կենտրոնի լավագույն մասնագետների օգնությամբ:

Դասընթացին մասնակցում է 20 փրկարար՝ ԱԻ նախարարության տարբեր ստորաբաժանումներից: Այն կտևի շուրջ 4 ամիս, ավարտից հետո մասնակիցները կստանան համապատասխան վկայագրեր:

ՀՀ ԱԻՆ ՓԾ տնօրենի տեղակալ, փ/ծ գնդապետ Ա. Խաչիկյանը, ՀՀ ԱԻ նախարար Դ. Տոնոյանի և ՓԾ տնօրեն Մ. Ղազարյանի անունից շնորհակալություն հայտնելով Երևանում գիտության և մշակույթի ռուսական կենտրոնի անձնակազմին, հույս հայտնեց, որ այս նախաձեռնությունը կունենա երկարաժամկետ ընթացք:

Երևանում գիտության և մշակույթի ռուսական կենտրոնի տնօրեն Սերգեյ Ռիբինսկին նշեց, որ ռուսերենի իմացության բարելավումը, կնպաստի երկու երկրների փրկարար ծառայությունների միջև համագործակցության խորացմանն ու սերտացմանը:

-Մենք կանենք առավելագույնը՝ հայ փրկարարների լեզվական գիտելիքները բարելավելու համար, ինչն անշուշտ կծառայի հայ-ռուսական բազմավեկտոր կապերի ամրապնդմանը, – եզրափակեց Ս. Ռիբինսկին:

Նշենք, որ ս.թ. հոկտեմբերի 28-ին ՀՀ ԱԻ նախարար Դ. Տոնոյանն ընդունել էր Երևանում գիտության և մշակույթի ռուսական կենտրոնի տնօրեն Սերգեյ Ռիբինսկու գլխավորած պատվիրակությանը: Հանդիպման ընթացքում կողմերը պայմանավորվել էին ՀՀ ԱԻՆ ՃԿՊԱ միջոցով մշակել փրկարարների՝ ռուսերենի իմացության կատարելագործման երկարաժամկետ և կարճաժամկետ ծրագրեր, ինչպես նաև՝ հեռահար ուսուցման փաթեթներ:

Իրավաբան.net

Հետևեք մեզ Facebook-ում

  Պատուհանը կփակվի 6 վայրկյանից...   Փակել