Օտարերկրյա հաշվառման համարանիշներով մեքենաների վարորդները կտուգանվեն նույն ընթացակարգով, ինչ ՀՀ վարորդները: Այս մասին լրագրողների հետ հանդիպման ժամանակ ասել է Ճանապարհային ոստիկանության պետ Եգոր Կարապետյանը:
Հիշեցնենք, որ վերջերս նա այցելել էր սահմանակետեր:
«Մենք մինչև տարվա վերջ բոլոր քաղաքացիները պետք է իրազեկվեն, որ արտասահմանյան հաշվառման համարանիշով ավտոմեքենաների վարորդները կտուգանվեն: Իրավախախտ վարորդները սահմանակետերում կիրազեկվեն իրենց կատարած խախտման մասին, նրանք կստորագրեն, որ ծանուցվել են և ելքի կամ մուտքի պահին կվճարեն տուգանքը»,-ասաց Կարապետյանը:
ՃՈ պետի տեղակալ Արմեն Խաչատրյանը սակայն նշեց, որ նրանք մտավախություն ունեն, որ մեկ անգամ Հայաստան եկած օտարերկրացին կծանուցվի, չի վճարի տուգանքը և այլևս Հայաստան չի գա:
«Նման ռիսկ կա, սակայն ձեռնարկված վարչարարական և տեխնիկական միջոցներով հնարավորինս հասցվում է նվազագույնի, որպեսզի ցանկացած իրավախախտող պատասխանատվության ենթարկվի և վճարի տուգանքը»,-նշեց նա՝ հավելելով սակայն, որ օտարերկրյա վարորդների համար սահմանված է վճարումները կատարելու նույն ընթացակարգը:
Արմեն Խաչատրյանը նաև նշեց, որ եթե վարորդը ելքի պահին չի վճարում տուգանքը, ապա այդ մարդուն այլևս Հայաստան մուտքի վիզա չի տրվի:
