Ռուսաց լեզվի դասավանդման հայեցակարգ ունենալու վերաբերյալ կրթության մասին որևէ օրենքում գրված չէ: Այս մասին Իրավաբան.net-ի հետ զրույցում նշում է Երևանի ավագանու անդամ Անահիտ Բախշայանը:
Նշենք, որ օրեր առաջ ՀՀ ԿԳ նախարար Լևոն Մկրտչյանը հրավիրել էր ռուսաց լեզվի հայեցակարգի վերաբերյալ հանրային քննարկում:
Անահիտ Բախշյանի խոսքով՝ հայեցակարգով չեն լավացնում որևէ առարկայի դասավանդման որակը:
«Հայեցակարգը թուղթ է: Եթե ուզում են որևէ առարկայի, այդ թվում ռուսերենի դասավանդման որակը բարձրացնե՞ն, ուրեմն պետք է ՀՆԱ-ի առնվազն չորս տոկոսը տրամադրեն կրթությանն ու գիտությանը, պիտի ուսուցչին տան արժանապատիվ աշխատավարձ, պիտի ուցուցիչ ընտրեն այն մարդուն, ով իսկապես ուսուցիչ է»,-ասաց նա:
Նրա խոսքով՝ այսօր պետք է մայրենիով ավելի շատ մտահոգվեն, մայրենիի նկատմամբ մի տեսակ չափազանց հանդուրժող վերաբերմունք կա:
«Ով ինչպես ուզում խոսում է, որտեղ շեշտը ուզում դնում է ու հատկապես հեռուստալրագրողները»,-նշեց նա:
Անահիտ Բախշյանին ավելի շատ վրդովեցնում է այն, որ կրթության համար հատկացվող միջոցները Կառավարությունը դարձրել է երկու տոկոսից էլ քիչ. «Սա նշանակում է մեծ-մեծ խոսել կրթության անհրաժեշտության մասին, բայց անել բոլորովին հակառակը: «Բալը թանկ է», կարճ ասած»:
Հիշեցնենք, որ սեպտեմբերի 12-ին ՀՀ կրթության և գիտության նախարարությունը շրջանառության է դրել հանրակրթական հիմնական ծրագրեր իրականացնող հաստատություններում ռուսաց լեզվի դասավանդման համակարգի զարգացմանն ուղղված մի նախագիծ:
Փաստաթղթում նշվում է, որ նկատի ունենալով բոլոր բնագավառներում ժամանակակից մասնագետների պատրաստման գործում օտար լեզուների իմացության կարևորությունը` ՀՀ կրթական համակարգում անհրաժեշտ է կատարել բարեփոխումներ, որոնք քաղաքացիներին հնարավորություն կտան տիրապետելու մի քանի օտար լեզուների, ինչպիսիք են ռուսերենը, մեկ կամ մի քանի եվրոպական (անգլերեն, ֆրանսերեն, գերմաներեն և այլն) և արևելյան (արաբերեն, պարսկերեն, չինարեն և այլն) լեզուներ:
Նախարարությունը պնդում է, որ ռուսաց լեզվի տիրապետումը հանդիսանում է քաղաքացու մրցակցային առավելությունը բարձրագույն կրթություն ստանալիս և մասնագիտական հմտություններ ձևավորելիս:
Եվգենյա Համբարձումյան
