Օրերս «Regnum» Լրատվական գործակալության հայաստանյան գրասենյակից դիմում էր ստացվել ՀՀ կառավարություն առ այն, որ Սևան քաղաքի մի շարք բնակիչներ ահազանգում են այն մասին, որ իրենց բնակելի շենքերին կից Շինարարների փողոցում գործում են ապօրինի շարժական գազալցակայաններ: Հայտնում են ԱԻՆ-ից:
Ստացված տեղեկատվության և ՀՀ կառավարության հանձնարարականի համապատասխան ՀՀ արտակարգ իրավիճակների նախարար Դավիթ Տոնոյանի հանձնարարությամբ ՀՀ ԱԻՆ աշխատակազմի Պետական հրդեհային և տեխնիկական անվտանգության տեսչությունն ուսումնասիրություններ է իրականացրել դիմումի հետքերով:
Ուսումնասիրության արդյունքում սույն թվականի հունիսի 10-ին և 12-ին Գեղարքունիքի մարզային հրդեհային և տեխնիկական անվտանգության տեսչության աշխատակիցների կողմից արձանագրվել են «Տեխնիկական անվտանգության ապահովման պետական կարգավորման մասին» ՀՀ օրենքի պահանջների խախտումներով շահագործվող արտադրական վտանգավոր օբյեկտներ: Օրենքի համաձայն՝ տեխնիկական անվտանգության ոլորտի օրենսդրության պահանջների պահպանման և կիրառման պարտավորությունը կրում են արտադրական վտանգավոր օբյեկտ շահագործող անձինք, որոնք, մասնավորապես, պետք է արտադրական վտանգավոր օբյեկտը ներկայացնեն գրանցման ռեեստրում և ապահովեն տեխնիկական անվտանգության փորձաքննության իրականացումը:
Տեսչության աշխատակիցների կողմից հայտնաբերվել են Սևան քաղաքի Շինարարների փողոցում վաճառք իրականացնող «ԶԻԼ» մակնիշի երեք մեքենաների վրա վերասարքավորված հեղուկ գազի լցավորման շարժական կայանները: Կայանների գործունեությունը դադարեցվել է և արգելվել:
ՀՀ ԱԻՆ աշխատակազմի Պետական հրդեհային և տեխնիկական անվտանգության տեսչության կողմից իրականացվում են վարչական վարույթներ, որոնց արդյունքում պատասխանատու անձինք կենթարկվեն համապատասխան տույժերի` օրենքի ողջ խստությամբ:
