ՀՀ կառավարությանն առընթեր անշարժ գույքի կադաստրի պետական կոմիտեի նախագահ Մարտին Սարգսյանը և Արմավիրի մարզպետ Աշոտ Ղահրամանյանն այսօր՝ հունվարի 23-ին այցելել են կոմիտեի նորաբաց «Արմավիր» սպասարկման գրասենյակ:
Կադաստրի պետական կոմիտեի նախագահը և մարզպետը շրջեցին գրասենյակի տարածքում, զրուցեցին աշխատակիցների հետ, տեղում ծանոթացան աշխատանքային պայմաններին, քաղաքացիների համար պատշաճ և որակյալ սպասարկում ապահովելու հնարավորություններին: Այս մասին հայտնում են տեղեկատվության և հասարակայնության հետ կապերի բաժնից:
Նորաբաց սպասարկման գրասենյակը հագեցած է ժամանակակից բոլոր հարմարություններով: Այցելելով կադաստրի պետական կոմիտեի «Արմավիր» սպասարկման գրասենյակ` քաղաքացիները կարող են ստանալ անվճար և սպառիչ խորհրդատվություն կադաստրի պետական կոմիտեի կողմից իրականացվող յուրաքանչյուր գործառույթի վերաբերյալ:
Սպասարկման գրասենյակում գործում են հերթերի կառավարման և վճարման էլեկտրոնային համակարգեր: Գրասենյակում ստեղծված են բոլոր հարմարությունները քաղաքացիներին որակյալ ծառայություններ մատուցելու համար:
Սպասարկման գրասենյակում դիմում ներկայացնելուց, ստորագրությունների իսկության ճանաչմամբ պայմանագիր կնքելուց, ավարտական փաստաթուղթ կամ խորհրդատվություն ստանալուց հետո յուրաքանչյուր քաղաքացի հնարավորություն ունի գնահատելու իրեն սպասարկող աշխատակցի աշխատանքը, ինչպես նաեւ իր դժգոհությունները կամ գոհունակությունը հայտնել ինչպես սպասարկման որակից, այնպես էլ համակարգի ողջ գործունեությունից:
Սպասարկման գրասենյակում տեղադրված նորագույն համակարգին ծանոթացնելիս ՀՀ ԿԱ ԱԳԿՊԿ նախագահ Մարտին Սարգսյանը նշեց, որ այդ համակարգի օգնությամբ քաղաքացին կարող է սենսորային էկրանի միջոցով գնահատել սպասարկման գրասենյակում իրեն տրամադրված ծառայության որակը: Կոմիտեի նախագահը հավելեց, որ ներդրված համակարգի միջոցով կիրականացվի սպասարկման գրասենյակների` քաղաքացիներին սպասարկող յուրաքանչյուր աշխատակցի գործունեության գնահատման վերաբերյալ ընթացիկ հաշվառում, իսկ յուրաքանչյուր ամսվա վերջին կոմիտեի կողմից կամփոփվի յուրաքանչյուր աշխատակցին տրված դիմումատուների գնահատականները: Այդ գնահատականները կհանդիսանան գրասենյակի աշխատակիցների խրախուսման դրույքաչափի վրա էականորեն ազդող գործոններից մեկը:
Սպասարկման գրասենյակում ներդրված համակարգը և ստեղծված պայմանները թույլ կտան կոմիտեի ղեկավարությանը առավել օբյեկտիվ պատկեր ունենալ կոմիտեի սպասարկման գրասենյակներում մատուցվող ծառայությունների որակի վերաբերյալ:
Արմավիրի մարզպետ Աշոտ Ղահրամանյանն իր խոսքում հավաստիացրեց, որ տեղի բնակչության համար իրապես անհրաժեշտություն էր նոր և ժամանակակից սարքավորումներով հագեցած կադաստրի սպասարկման գրասենյակի բացումը, ինչը, անշուշտ, մատուցվող ծառայությունները դարձնում է էլ ավելի օպերատիվ և որակյալ:
Հավելենք նաև, որ «Արմավիր» սպասարկման գրասենյակը տեղափոխվել է նոր՝ ք. Արմավիր, Հանրապետության 6 հասցեում գտնվող վարչական տարածք, որը ՀՀ կառավարության համապատասխան որոշմամբ հատկացվել է կադաստրի պետական կոմիտեին, ինչի արդյունքում կոմիտեն կարողացել է տնտեսել լուրջ ֆինանսական միջոցներ, որոնք վերջինս տրամադրում էր վարձակալած տարածքում սպասարկման գրասենյակի գործունեության համար: Այսօր սպասարկման գրասենյակը գործում է պետական սեփականություն հանդիսացող տարածքում:
